Diga e Pollatës: Investim Strategjik për Sigurinë Ujore të Rajonit të Llapit
Sot, në ambientet e Ministrisë së Mjedisit, Planifikimit Hapësinor dhe Infrastrukturës (MMPHI), u prezantua zyrtarisht projekti për ndërtimin e Digës së Pollatës – një ndër investimet më të rëndësishme për sigurinë ujore dhe zhvillimin e qëndrueshëm të rajonit të Llapit.
Në këtë prezantim morën pjesë Ministri në detyrë Liburn Aliu dhe Zëvendësministri Jeton Raka, të cilët theksuan rëndësinë jetike të këtij projekti për furnizimin me ujë të qëndrueshëm për mijëra banorë të zonës.
Diga e planifikuar do të ketë një kapacitet të përgjithshëm mbi 11 milionë metra kub ujë, prej të cilave mbi 9.8 milionë metra kub do të jenë të dobishme për furnizim. Projekti përfshin tre skenarë të ndryshëm furnizimi me ujë, të cilët, në varësi të ndarjes nga sistemi aktual i Batllavës, do të mundësojnë furnizimin e deri në 117,497 banorëve me një rrjedhje prej 314 litrash për sekondë.
Ky projekt, i realizuar nga kompania e kontraktuar nga MMPHI, konsiderohet një hap i madh drejt garantimit të sigurisë ujore në afat të gjatë dhe një parakusht për zhvillimin e qëndrueshëm urban dhe bujqësor në Llap.
Ministria ka premtuar se punimet do të ndiqen me prioritet të lartë dhe do të jenë në përputhje me standardet më të larta teknike dhe mjedisore.
