Më 2 dhjetor, Inspektorati Policor i Kosovës ka njoftuar për suspendimin e dy zyrtarëve policorë, nën dyshimin për përfshirje në një rast të kanosjes. Njëri prej të suspenduarve është Driton Agaj, pjesëtar i njësisë së trafikut.
Fillimisht, masa e pezullimit ishte caktuar për tre ditë – nga 2 deri më 5 dhjetor. Mirëpo sot, Agaj është njoftuar se pezullimi do të vazhdohet deri në një afat të pacaktuar.
Për këtë vendim është ankuar avokati i tij, Faton Hyseni, i cili ka deklaruar për Insajderin se zyrtari policor nuk ka qenë i përfshirë në rastin e kanosjes, por babai i tij.
Sipas avokatit, konflikti mes familjeve ka qenë i kahershëm dhe Agaj po përballet padrejtësisht me pasoja disiplinore.
“Çështja është kështu: babai i tij e ka pasur një problem, jo Dritoni personalisht. Ky problem ka ekzistuar edhe më herët mes një familjeje që jeton afër tyre, por nuk ka të bëjë fare me Dritonin. Tash pala që pretendon se është e dëmtuar ka paraqitur ankesë në IPK, dhe IPK e ka suspenduar për tre ditë. Sot masa i është vazhduar për kohë të pacaktuar, pa ndonjë arsye apo provë se ku ka vepruar kundërligjshëm”, tha Hyseni.
Ai shtoi se babai i Agajt ka qenë i dyshuar para dy-tre ditësh për veprën penale të kanosjes, dhe se, sipas tij, këto raportime dhe ankesa po bëhen me qëllim degradimi të zyrtarit policor.
“E njëjta familje ka tentuar edhe në prill që ta degradojë, Driton Agajn. IPK i ka zhvilluar procedurat dhe ai është shpallur i pafajshëm”, deklaroi avokati.
Hyseni ka përshkruar gjendjen shëndetësore të Agajt si të rënduar, duke shtuar se zyrtari policor po përjeton ankth dhe depresion për shkak të pezullimit dhe mungesës së informacioneve zyrtare.
“Dritoni është në gjendje jo të mirë shëndetësore. Nuk ka marrë asnjë shpjegim – as nga drejtori i tij, Jeton Rexhepi, as nga IPK. Thjesht i ka ardhur pezullimi, pa asnjë veprim që e lidh atë me rastin”, tha ai.
IPK deri më tani nuk ka dhënë detaje shtesë për arsyet e vazhdimit të pezullimit, ndërsa pritet që hetimet të vijojnë deri në sqarimin e plotë të rastit.
