Vendosja e kryqave në vendbanime të banuara ekskluzivisht nga myslimanë në rajonin e Llapit, pa leje të institucioneve përkatëse, po shkakton shqetësim të madh mes qytetarëve. Këto veprime, të cilat nuk përputhen me rregullat fetare dhe traditën e harmonisë ndërfetare në Kosovë, po nxisin reagime të ashpra në komunitetin lokal.
Kosova, e njohur për bashkëjetesën e gjatë dhe tolerancën mes feve të ndryshme, po përballet me një sfidë të re që rrezikon të minojë këtë harmoni. Shumë qytetarë dhe grupe shoqërore kanë shprehur shqetësimin e tyre se veprime të tilla mund të thellojnë ndasitë dhe të rrisin tensionet mes bashkësive fetare.
Kryqi, një simbol me vlerë të madhe shpirtërore për komunitetin katolik, është keqpërdorur në këto raste, duke krijuar mosmarrëveshje të panevojshme. Qytetarët apelojnë për ruajtjen e paqes dhe mirëkuptimit mes feve, duke theksuar se akte të tilla nuk duhet të përdoren për të krijuar përçarje.
Në këto rrethana, është e rëndësishme që autoritetet përkatëse të ndërhyjnë dhe të mbrojnë harmoninë ndërfetare, që është një nga shtyllat kryesore të bashkëjetesës në Kosovë.
Postimi i tij i plot:
Rreth Vendosjes së Kryqave dhe ndikimi në Harmonin Ndërfetare
Kosova, një vend me një histori të pasur multikulturalizmi dhe harmonisë ndërfetare, është duke u përballur me një sfidë të re dhe shqetësuese: Vendosjen e kryqave në vendbanime ku jetojnë vetëm musliman dhe pa leje te institucioneve, veçanërisht në rajonin e Llapit.
Kjo iniciativë, që duket se shkel rregullat edhe të besimit katolik dhe traditën e harmonisë ndërfetare, po ngjall shqetësime të mëdha mes qytetarëve dhe grupeve të ndryshme shoqërore.
Ndërsa Kosova ka qenë një shembull i tolerancës dhe bashkëjetesës mes komuniteteve fetare, veprime të tilla nuk janë vetëm në kundërshtim me këtë traditë, por gjithashtu i japin një nxitje tjertër ekstremizmit fetar.
Është e qartë se vendosja e kryqave në mënyrë ilegale nuk shërben për forcimin e besimit, por përkundrazi, sjell ndasi dhe tensione mes qytetarëve.
Përmes këtij akti, ka një rrezik të madh që komuniteti katolik, i cili ka praktikuar besimin e tij në paqe dhe harmoni, do të etiketohet si pjesë e një agjende më të gjerë që synon të krijojë përçarje.
Ideologjitë radikale dhe ekstremizmi fetar nuk janë shprehje e besimeve të vërteta; ato janë produkt i frikës, injorancës dhe mungesës së dialogut.
Pse duhet të vihet në pikëpyetje besnikëria e një komuniteti të tërë për shkak të disa individëve që dështojnë të kuptojnë thelbin e fjalisë “në emër të Zotit”?
Llapi, dhe mbi të gjitha Kosova, ka treguar se besimet nga islami te katolicizmi, mund të jetojnë në harmoni.
Kjo iniciativë e vendosjes së kryqave ilegale, i shërben vetëm atyre që kanë një agjendë të caktuar antikombetare dhe që dëshirojnë të minojnë këtë harmoni, duke nxitur ndasi dhe tension.
Ajo që është e rëndësishme tani është që qytetarët e Kosovës, pavarësisht besimit te qëndrojnë të bashkuar për të ruajtur atë që kemi ndërtuar me shumë sakrifica dhe durim.
Ne nuk duhet të lejojmë që veprime të tilla të minojnë përparimin tonë dhe të na kthejnë prapa në kohë kur ndasia dhe urrejtja ishin te zakonshme.
Në përfundim, është detyra jonë që të angazhohemi për një debat të hapur dhe konstruktiv rreth kësaj çështjeje.
Të gjithë ne kemi një përgjegjësi për të mbrojtur harmoninë ndërfetare dhe për të siguruar që çdo veprim që bëjmë, qoftë në emër të besimit ose ndonjë ideologjie tjetër, të jetë në shërbim të paqes dhe mirëkuptimit dhe jo të përqarjes dhe urrejtjës.