Komuna e Podujevës, përmes Drejtorisë së Bujqësisë, Pylltarisë dhe Zhvillimit Rural, ka shpallur thirrjen publike për aplikim në projektin “Furnizimi dhe montimi i serrave”, që synon përkrahjen e fermerëve lokalë dhe zhvillimin e bujqësisë vendore.
Në kuadër të këtij projekti, komuna do të mbështesë gjithsej:
- 134 përfitues me serra 50 m²,
- 10 përfitues me serra 500 m²,
- 5 përfitues me serra 1000 m².
Projekti do të realizohet me bashkëfinancim, ku fermerët mbulojnë 30% të vlerës, ndërsa Komuna 70% përmes subvencioneve.
Aplikuesit duhet të jenë të regjistruar si fermerë, të kenë vend të përshtatshëm për serra dhe mundësi për ujitje. Përparësi do të kenë gratë fermere, ata me përgatitje profesionale bujqësore, si dhe fermerët që nuk kanë përfituar nga subvencionet komunale apo donatorët në tre vitet e fundit.
Afati i fundit për aplikim është 27 nëntor 2025, ora 16:00, ndërsa aplikimet dorëzohen në Zyrën e Shërbimit të Qytetarëve në Komunën e Podujevës.
