Kryetari i Komunës së Podujevës, Shpejtim Bulliqi ka nënshkruar sot marrëveshje bashkëpunimi me përfaqësuesin e Organizatës “CARE”, Egzon Gërxhaliu për zbatimin e projektit “Avancimi i Përfshirjes së Grave të Kosovës në Agrobiznes” përgjatë vitit 2025-2026.
Qëllimi i kësaj marrëveshje është rritja e kapaciteteve të grave në bujqësi dhe pajisjen e tyre me pajisje prodhuese të modernizuara.
Ndërsa, objektivi i projektit është të kontribuojë në një zhvillim socio-ekonomik më gjithëpërfshirës gjinor në zonat rurale, përmirësimin e konkurrencës së agrobizneseve të tyre duke mundësuar një mjedis të favorshëm për zhvillim socio-ekonomik, etj.
Marrëveshja do të përqëndrohet në investimet e sektorëve më fitimprurës të bujqësisë si ngritja e serave të vogla për kultivimin e perimeve, pajisjet për bletari, makineri të vogla bujqësore dhe pajisje qumështi.
Kryetari Bulliqi falënderoi përfaqësuesit e Organizatës “CARE” për këtë marrëveshje dhe tha se ndihma e Komunës për sektorin e bujqësisë e veçmas për gratë që merren me agrobiznes nuk do të mungojë asnjëherë.
Vlera e mbështetjes së grave në formë paisjesh përmes pakove të ndryshme të granteve do të jetë deri në 11, 200 euro nga CARE, ndërsa Komuna do të participojë me 8000 euro.
Në kuadër të marrëveshjes gjithashtu përfshihen organizimi i trajnimeve, këshillave dhe monitorimeve të rregullta tek përfituesit.
08.01.2025, Podujevë
Zyra për Marrëdhënie me Publikun dhe Informim
