Kryetari i Komunës së Podujevës përmes një postimi ka njoftuar se sot ka pasur kënaqësinë që të jetë pjesë e debatit me nxënës të shkollave të mesme “Aleksandër Xhuvani” dhe “Isa Boletini”, debat ky i organizuar nga organizata Teach For Kosova për zbatimin e projektit “Promovimi i të menduarit kritik dhe kohezionit multietnik midis të rinjve”.
“Para nxënësve prezantova disa nga projektet dhe angazhimet tona në sektorin e arsimit, me qëllim të përmirësimit të infrastrukturës shkollore dhe cilësisë në arsim. Po ashtu ndava storie e ngjarje nga jeta personale dhe profesionale, ku dhe i inkurajova që të mësojnë e lexojnë sa më shumë duke u përgatitur profesionalisht për të ardhmen, sepse e ardhmja ju takon atyre e vendi ynë ka nevojë për dijen dhe përgatitjen profesionale të tyre.” – ka shkruar kryetari Bulliqi.
