Kryetari i Kuvendit të Kosovës, Glauk Konjufca, ka thënë se synohet që Kosova të jetë lider në rajon për transparencë parlamentare.
Konjufca i ka bërë këto komente të mërkurën në Kuvendin e Kosovës, ku gjatë Forumit për Transparencë Parlamentare, u mbajt konferenca vjetore me organizata të shoqërisë civile dhe njëherësh u lansua Plani i Veprimit për Kuvend të Hapur 2023-2026.
Kryeparlamentari Konjufca përmendi se nga Kuvendi i Kosovës çdo herë do të promovohet dialogu dhe partneriteti konstruktiv me të gjitha palët, për të përmirësuar tutje transparencën në punën e Kuvendit, pasi që, siç tha, synimi i institucionit që përfaqëson është rangimi i Kosovës si lidere në rajon sa i përket transparencës parlamentare.
Në fjalimin e tij, kreu i Kuvendit e konsideroi mjaft të rëndësishme edhe punën e hartimit të Kodit të Etikës për deputetët.
Konjufca bëri thirrje që trendi i aktiviteteve të cilat ndikojnë në rritjen e transparencës parlamentare të vazhdohet tutje, duke zbatuar gjithnjë praktikat më të mira në këtë sferë.
