Presidentja e Kosovës, Vjosa Osmani, i ka ftuar nga ora 13:00 liderët e partive politike për t’u konsultuar në lidhje me datën e zgjedhjeve.
Ky takim është thirrur pak orë pasi Osmani ka nxjerrë dekretin për shpërndarjen e Kuvendit të Kosovës.
Zgjedhjet duhet të caktohen brenda afatit 45 ditor nga shpërndarja e Kuvendit.
Në mëngjesin e 06.03.2026, presidentja e Kosovës, Vjosa Osmani, ka shpallur dekretin për shpërndarjen e Kuvendit të Kosovës pasi deri në përfundim të afatit kushtetues nuk u arrit të zgjidhet presidenti.
“Në përputhje kam nxjerrë dekretin për shpërndarje të Kuvendit“- ka deklaruar ajo në konferencën për media më 06.03.2026, të thirrur një ditë pas dështimit të seancës për zgjedhjen e presidentit.
“Për këtë arsye kam vendosur ta shpërndaj Kuvendin dhe të shpall zgjedhjet e reja pas konsultimeve me partitë politike. Natyrisht qytetarët nuk kanë dashur zgjedhje këtë situatë e ka krijuar Kuvendi që ka dështuar për ta kryer detyrën e tyre kushtetuese. Këtu e sollën vendin njerëz të papërgjegjshëm e me qëllime të rrezikshme”- ka deklaruar ajo
Në seancën e mbajtur në orët e vona të 05.03.2026, 66 deputetë ishin prezentë në seancën e Kuvendit të Kosovës në të cilën do të votohej në rundin e parë për president të Republikës së Kosovës, ndërsa 54 nuk ishin prezentë.
Kryetarja e Kuvendit të Kosovës, Albulena Haxhiu, tha se për të vazhduar më tutje duhet të jenë 80 deputetë presentë. Haxhiu ka ndërprerë seancën në mungesë kuorumi.
Lëvizja Vetëvendosje kishte nominuar Mulhaxha Kollçakun si kundërkandidate për Glauk Konjufcën për pozitën e presidentit të Republikës së Kosovë.
Në mbrëmjen e 05.03.2026, në një seancë të jashtëzakonshme, u vendosën në votim amandamentet për zgjedhjen e Presidentit nga populli, por nuk pati votat e mjaftueshme.
Mbrëmë pas dështimit të seancës për zgjedhjen e Presidentit, kryetarja e Kuvendit të Kosovës, Albulena Haxhiu, ka njoftuar se i janë drejtuar Gjykatës Kushtetuese lidhur me vlerësimin e kushtetutshmërisë së procedurës për zgjedhjen e presidentit të Kosovës
