Për tentimin që Kryeministri Albin Kurti t’ia faturojë vetes meritat për liberalizim të vizave, ka reaguar edhe nënkryetarja e Partisë Demokratike të Kosovës, Vlora Çitaku.
“Sa për kontributin tuaj në këtë proces, ai fillon dhe përfundon me gazin lotëshjellës në parlament”, shkroi Çitaku, kjo referuar kohës kur Kosova ishte në pako me Ukrainën dhe Gjeorgjinë për liberalizimin e vizave më 2016, e ku procesi ishte ndërlidhur me kriterin e Demarkacionit të kufirit me Malin e Zi.
“Kryeministri në një status të gjatë në facebook duke bërë përpjekje me ia dhanë vetes meritat për liberalizimin e vizave (në vitin 2024), paska thënë të pavërteta të mëdha, duke justifikuar kështu edhe vonesat e BE për liberalizimin e vizave”.
“Kryeministër, kriteret Kosova i ka përmbushur moti. Siç shpresoja ta kishit kuptuar së paku javën e kaluar kur çështja e liberalizimit të vizave për Kosovën u hoq nga agjenda, vonesat për Kosovën, së paku nga viti 2018 janë të pajustifikueshme dhe të natyrës politike”, përfundoi Vlora Çitaku.
Si provoi Kurti ta përvetësojë atë?
Faturën e meritave ia shkroi vetes për çështjen e dakordësimit të ambasadorëve të BE-së për liberalizimin e vizave.
Kryeministri i Kosovës, Albin Kurti, nuk ngurroi të vetëlavdërohet se qeverisja e tij “rrënjësisht e ka ndryshuar imazhin e Kosovës”.
Derisa thotë se është e vërtetë që kriteret tenike për liberalizim të vizave ishin përmbushur qysh më herët, ai shton se kërkesat për sundim të ligjit, luftim të krimit dhe korrupsionit dhe respektim të institucioneve të pavarura nuk përmbusheshin dot.
Por, sipas tij, me qeverisjen e tij ndërruan edhe hesapet.
