Ish-zëdhënësi i Ushtrisë Çlirimtare të Kosovës dhe ish-kryeparlamentari, Jakup Krasniqi, në përfundimin e fjalës së tij para trupit gjykues të Gjykatës Speciale në Hagë, ka drejtuar tri lutje, raporton Gazeta Sinjali.
Krasniqi tha se lutja e parë është që trupi gjykues të mos lejoj keqpërdorimin e opinioneve individuale të pasluftës për kohën e luftës.
Lutja e dytë e tij ishte që trupi gjykues të mos lejojë që shënimet e tij për shkrimin e librave të përdoren si dëshmi për vepra penale, siç pretendon ZPS-ja.
“Lutja e tretë për komunikatat: Unë po e lexoj atë që është thënë në vendimin për lirimin e Fatmir Limajt në Hagë”, tha Krasniqi.
“Komunikatat si material propagandistik ishin rritja e respektit për UÇK-në dhe autoritetit të saj me qëllim që njerëzit të besonin në të dhe të anëtarësoheshin. Paragrafi 118 në aktvendimin e TNH-së për Fatmir Limajn. E njëjta gjë thuhet edhe në aktvendimin lirues për Ramush Haradinajn”, është shprehur Krasniqi.
Tutje, Krasniqi tha se shënimet e tij për të shkruar libra janë keqpërdorur skajshmërishtë nga ana e Prokurorisë.
“Ka marrë materiale të shumta, ka marrë letrat që i kam çuar nga burgu por ato nuk janë kurrfarë dëshmie për të cilat po pretendon prokuroria në këtë aktakuzë”, ka deklaruar ish-kryeparlamentari.
