Katër anëtarët e Bordit të Drejtorëve të Ndërmarrjes Publike “Telekomi i Kosovës”, të emëruar vjet nga Qeveria e Kosovës, që disa ditë kanë ofruar dorëheqjen e tyre nga pozita. Shkak u bënë përplasjet e tyre me kryeshefen ekzekutive, Burbuqe Hana
Gazeta Online Reporteri.net merr vesh se Petrit Nahi, Rrezarta Pllana, Sajmie Thaçi dhe Lindita Toçi, prej ditësh kanë ofruar dorëheqjet e tyre nga Bordi i Telekomit.
Për to është njoftuar edhe vetë Kryeministri Albin Kurti, megjithëse zyrtarisht ende nuk është bërë asnjë njoftim publik, as nga Qeveria e Kosovës e as nga Telekomi.
Gazeta Online Reporteri.net, të mërkurën, ka tentuar t’i kontaktojë anëtarët e dorëhequr të Bordit të Telekomit, por asnjëri prej tyre nuk janë përgjigjur në thirrjet telefonike.
Si konfirmim të gjendjes në Telekom dhe dorëheqjes së tij, Petrit Nahi, në rrjetin profesional “LinkedIn” tashmë e ka njoftuar se ka përfunduar, para kohe, mandatin e tij si kryesuesi i Bordit në ndërmarrjen publike.
bord i Drejtorëve të Ndërmarrjes Publike “Telekomi i Kosovës” ishte emëruar më 24 korrik 2024, me mandat tre vjeçar.
Shkak i kësaj situate në Telekom, siç merr vesh gazeta online Reporteri.net u bënë përplasjet e vazhdueshme në muajt e fundit të Bordit me kryeshefen ekzekutive Burbuqe Hana.
kulmuan rreth një konkursi të hapur në Telekom, në gusht të këtij viti, për pozitën e Zëvëndeskryeshefit ekzekutiv të ndërmarrjes publike. Bordi ka insistuar që zëvendëskryeshefi i ri t’i raportojë drejtpërdrejt atyre, ndërsa Hana ka kërkuar që raportimi të bëhet përmes saj, si kryeshefe ekzekutive.
Situata ka agravuar edhe në pakënaqësi të Bordit ndaj Zyrtarit Kryesor të Thesarit dhe Financave në Telekom, Feim Kelmendi, dhe u thellua kur kryeshefja Hana ka akuzuar për paaftësi profesionale dhe ka dërguar ankesë tek Ministrja e Ekonomisë për sekretarin Shekip Fazliu. Ky i fundit kishte mbështetjen e bordit. /Reporteri.net/.
