Kompania rajonale e ujësjellësit “Prishtina” ka shkyçur nga rrjeti disa biznese në kompleksin “Santea” në “Dardani”, që për kohë të gjatë nuk kishin paguar shërbimin. Në këtë kompani paralajmëruan se aksioni do të vazhdojë në biznese e institucione dhe do të nisë edhe në sektorin e amvisërisë.
Aksioni është realizuar të mërkurën nga Kompania Rajonale e Ujësjellësit, të cilën e ka asistuar edhe policia.
Zëdhënësja e Ujësjellësit, Arjeta Mjeku, ka bërë të ditur se aksioni do të vazhdojë deri në fund të vitit në biznese e institucione, e më pas do të nisë edhe në sektorin e amvisërisë.
“Ka mjaft lokale që nuk kanë paguar për shërbimet e ujësjellësit dhe kanalizimit. Ne në moment që i vizituam, disa pranuan që ta paguajnë borxhin e tërësishëm, disa pranuan ta paguajnë një pjesë të borxhit dhe pjesën tjetër ta riprogramojnë, po në të njëjtën kohë realizuam edhe 2 apo 3 shkyçje të lokaleve të cilat refuzuan që ta paguajnë borxhin për shërbimet e ujit”, ka thënë Mjeku.
Borxhi që kanë qytetarët dhe bizneset ndaj KRU “Prishtina”, sipas kompanisë, është më shumë se 45 milionë euro. Prej tyre, rreth 40 milionë euro është vlera e borxhit nga konsumatorët e sektorit të amvisërisë.
