ADVERTISEMENT
Kryeministri, Albin Kurti, bashkë me Kryetarin e Kuvendit, Glauk Konjufca, Nënkryetaren e Kuvendit, Saranda Bogujevci, Kryetarin e Podujevës, Shpejtim Bulliqi, familjarë e miq të Monit dhe Arbenit, ministra, anëtarë të kryesisë dhe deputetë e aktivistë të Lëvizjes VETËVENDOSJE!, bënë sot homazhe te varri i Mon Balajt në Podujevë.
Ata thanë se drejtësia për ta dhe liria e vetëvendosja e popullit të Kosovës janë të lidhura bashkë në këtë shekull.
Postimi i plotë:
“Homazhe në nderim të Mon Balajt dhe Arben Xheladinit.
Lule të freskëta te varri i Monit dhe Arbenit për të kujtuar që brezat e shqiptarëve e bartin pishtarin e lirisë nga njëri te tjetri duke mundësuar kështu ecjen e popullit tonë.
16 vjet më parë, 10 shkurt 2007, Arben Xheladini dhe Mon Balaj krahas mijëra demonstruesve të tjerë që po kundërshtonin në formë të marshimit paqësor padrejtësitë e Pakos së Ahtisaarit, u qëlluan nga policia rumune e UNMIK-ut, që siç edhe dëshmuan përplot raporte të organizatave që merren me të drejta të njeriut, përfshi vetë Panelin Këshillëdhënës për të Drejtat e Njeriut të UNMIK-ut (2 mars, 2015) kishte përdorur forcë absolutisht të panevojshme për t’i shpërndarë demonstruesit.16 vjet më vonë ende nuk ka drejtësi për Arben Xheladinin dhe Mon Balajn.
Nuk do të ndalemi së kërkuari drejtësi për Monin dhe Arbenin. Drejtësia për ta dhe liria e vetëvendosja e popullit të Kosovës janë të lidhura bashkë në këtë shekull.
Lavdi jetës dhe veprës së Mon Balajt dhe Arben Xheladinit.”
