ADVERTISEMENT
Kryetari i Komunës së Podujevës, Shpejtim Bulliqi, gjatë ditës ka vizituar vëllezërit Sejdiu në fshatin Dumnicë për të parë nga afër fushatën e korrje-shirjeve që tashmë ka nisur edhe në territorin e Podujevës.
Kryetari Bulliqi i përgëzoi fermerët për rendimentet e larta të grurit dhe uroi që fushata e korrje-shirjeve të ecë sa më mbarë dhe fermerët të kenë rendimente sa më të begata. Në këtë vizitë tek fermerët ishte edhe drejtoresha e Bujqësisë, Pylltarisë dhe Zhvillimit Rural, Lirie Hoti.
Vëllezërit Sejdiu të cilët kanë të mbjellur mbi 150 hektarë me grurë dhe 150 hektarë të tjerë me kultura të tjera bujqësore, u shprehën të kënaqur me rendimentet e sivjetme. Ata theksuan se këtë vit rendimentet me grurë janë më të lartat që nga paslufta, ku mesatarja e një hektari sillet nga 6 mijë deri në 7.2 mijë kg.
