Para disa muajsh, Njësia Rajonale e Antidrogës në Gjakovë kishte zhvilluar një operacion që rezultoi me identifikimin e disa personave të dyshuar që kishin kultivuar mijëra bimë kanabis në zonën e Malishevës për muaj me radhë. Gazeta Sinjali raportoi sot se një person atë kohë ishte arrestuar, por Policia kishte shpallur në kërkim edhe të dyshuar të tjerë.
Burimet nga Prokuroria kanë bërë me dije se personi që u arrestua pasi qëndroi në arrati për një kohë është Leonard Hamita, 29-vjeçar, i cili është arrestuar gjatë ditës së djeshme në kufi.
Sinjali mëson se ai është kapur në Merdar, ku pasi ishte ndaluar nga Policia, kishte rezultuar se i njëjti ndodhet në listën e personave të kërkuar. Pas verifikimit nga ana e Policisë, i dyshuari është shoqëruar për në Drejtorinë Rajonale të Policisë në Gjakovë, për t’u intervistuar për veprën me të cilën ngarkohet.
Ai po dyshohet se në bashkëkryerje edhe me të dyshuar të tjerë, nga muaji maj deri në muajin korrik kanë kultivuar kanabis në parcela të ndara, në zonën e Malishevës.
Ndryshe, gjatë aksionit të zhvilluar për këtë rast, në muajin korrik ishte arrestuar edhe Avni Mazreku, i cili kishte tentuar që të ikte nga vendi i ngjarjes, por që nuk arriti të arratisej.Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata./Gazeta Sinjali
