Nën kritikat e ultra-nacionalistit Dodik, kryeministri Kurti është takuar në Sarajevë me anëtarin boshnjak dhe atë kroat të presidencës trepalëshe (boshnjake, kroate dhe serbe) të Bosnje e Hercegovinës.
Kryeministri i Kosovës, Albin Kurti, gjatë takimeve të ndara që pasur në Sarajevë, fillimisht me Denis Beçiroviç-in, anëtarin boshnjak të Presidencës së Bosnje e Hercegovinës, njëherësh Kryetarin e Presidencës dhe Zheljko Komshiç-in, anëtarin kroat të presidencës së BeH-së, ka folur, ndër të tjera, për zhvillimet e fundit në vendet respektive dhe në rajon ndikimet e jashtme keqdashëse.
Kurti, vizita e të cilit u kundërshtua ashpër nga Presidenti ultra-nacionalist i Republikës Srpska – entiteti serb në BeH – Millorad Dodik, në të dy takimet e njëpasnjëshme në ndërtesën e presidencës, ka biseduar për marrëdhëniet ndërmjet dy vendeve dhe mënyrat për të rritur bashkëpunimin tregtar, me ç’rast u shqyrtua mundësia e organizimit të një forumi të përbashkët ekonomik, dhe për të shtuar shkëmbimet në kulturë dhe edukim.
Kreu i ekzekutivit, siç njofton zyra e kryeministrit, theksoi se njoftimi i Qeverisës së Kosovës, sipas së cilit nga 1 janari i vitit të ardhshëm, pra më pak se një muaj, qytetarët e BeH-së do të mund të udhëtojnë drejt Kosovës me letërnjoftime, do të kontribuojë shumë në rritjen e bashkëpunimit dhe miqësisë ndërmjet dy vendeve.
Gjithashtu, theksoi rëndësinë që edhe BeH-ja të ratifikojë marrëveshjen e mobilitetit për lëvizje të lirë e dalë nga Procesi i Berlinit, në mënyrë që përfitimet nga lëvizja e lirë të jenë të dyanshme, e cila po bllokohet nga RS-ja – përmes vetos.
Gjatë takimeve, bëhet me dije se u diskutua edhe për zhvillimet e fundit në vendet respektive dhe në rajon, dhe për rëndësinë e bashkëpunimit rajonal veçanërisht në kuadër të Procesit të Berlinit me qëllim integrimin e Ballkanit Perëndimor në Bashkimin Evropian dhe në përballje me ndikimet e jashtme keqdashëse.
Kurti ka falënderuar Beçiroviç-in dhe Komshiç-in për mikpritjen në Sarajevë dhe bisedën e hapur dhe produktive.
Ndaj kryeministrit, gjithmonë sipas njoftimit, u shpreh mirënjohje për reagimin e shpejtë dhe ndihmën financiare që Kosova i kishte dhënë në përballje me përmbytjet tragjike në BeH gjatë muajit tetor, dhe për shpalljen e 11 Korrikut si Ditë Përkujtimore të Gjenocidit të Bosnje dhe Hercegovinës.
Pas takimeve në Presidencës, kryeministri do të vijojë vizitën me takime në Këshillin e Ministrave të Bosnjës dhe Hercegovinës.
