Kryeministri i Kosovës, Albin Kurti është parë duke pirë kafenë e mëngjesit në Ohër me kreun e BDI-së, Ali Ahmeti dhe ministrin e Punëve të Jashtme të Maqedonisë së Veriut, Bujar Osmani.
Kurti do të takohet sot me presidentin e Serbisë, Aleksandër Vuçiq nën ndërmjetësimin e Bashkimit Evropian dhe mbështetjen e monitorimin e Shteteve të Bashkuara të Amerikës për të diskutuar e finalizuar Aneksin e Implementimit të Propozimit Evropian për normalizim të marrëdhënieve Kosovë – Serbi.
Bashkësia ndërkombëtare kanë deklaruar se presin përparim të madh në këtë takim, ndërsa Kurti e Vuçiq duket se ndajnë qasje të ndryshe përpara këtij takimi.
Kryeministri Kurti është shprehur i gatshëm për të hedhur nënshkrimin mbi Aneksin e Implementimit, por për një gjë të tillë nuk është pajtuar Vuçiq.
Mbetet të shihet se cili do të jetë epilogu i takimeve që do të mbahen sot, pasi fillimisht, palët do të zhvillojnë diskutime bilaterale me Përfaqësuesit e Bashkimit Evropian dhe në fund do të jetë takimi i përbashkët. /Paparaci.com/
