Përpjekjeve të eksponentëve të Lëvizjes Vetëvendosje për të “hedhur baltë” mbi të Dërguarin e Posaçëm të ShBA’së për Ballkanin Perëndimor, Gabriel Esobar, u është bashkuar edhe vetë lideri i kësaj partie, kryeministri i vendit, Albin Kurti. Së fundmi, Kurti ka lëshuar një deklaratë thumbuese ndaj emisarit Escobar, si palë përkrahëse në arritjen e një marrëveshjeje finale Kosovë-Serbi.
Kritikën e tij ndaj Escobarit, Kurti e nisi kur foli për Asociacionin, në një intervistë për Radion Evropa e Lirë. Kryeministri vuri në qendër të vëmendjes një deklaratë të fundit të Escobarit, i cili tha se “një person [Kurti] nuk mund ta shmang një detyrim [Asociacionin]” me idenë që “Kurti nuk ka nevojë të pajtohet, pasi Kosova është pajtuar”.
Si për t’iu kundërvënë kësaj deklarate të emisarit amerikan, Kurti tha se në vend që Escobar ta bënte këtë koment sa ishte në Prishtinë, ka pritur të deklaronte se Serbia duhet ta njohë Kosovën, sa ishte në Beograd, shkruan Gazeta Online Reporteri.net.
Dhe për këtë, Kurti shtoi se njëjtë sikur nuk pret ta marrë aprovimin e tij për themelimin e Asociacionit, Escobar duhej të mos e llogariste as presidentin serb, Vuçiq, për qëndrimin e tij ndaj Kosovës.
“Unë kam pritur që ai në Beograd do të deklarojë që, pavarësisht presidentit të Serbisë, Serbia duhet ta njohë Kosovën në vend se në Prishtinë të thotë, pavarësisht kryeministrit të Kosovës, duhet të bëhet Asociacioni”, theksoi kryeministri Kurti, në intervistë për REL.
Kritikat e tij ndaj bashkësisë ndërkombëtare, Kurti i intensifikoi edhe më tepër teksa, edhe një herë tjetër, përmendi faktin se ka pritur që takimet mes të dy palëve në dialog do të ishin më të shpeshta, “siç jemi dakorduar më 18 gusht”.
“Unë kam pritur që do të kemi takime të rregullta mujore, siç jemi dakorduar më 18 gusht. Kjo nuk ndodhi. Kam besuar se mbase është për shkak të refuzimit të Serbisë, ose ndoshta ndërmjetësit kanë ndonjë plan që s’e dimë as ne”, tha Kurti.
Për t’u rikthyer edhe njëherë te thumbimet e Kurtit ndaj Escobarit, duhet të kujtojmë se pushteti i tanishëm thuajse asnjëherë nuk ka pasur raporte të mira me emisarët amerikanë.
Madje, në vitin 2020, Vetëvendosje kishte kundërshtuar hapurazi emisarin e ShBA’ve në administratën e ish-presidentit Trump, Richard Grenell, gjë të cilës i ishte bashkuar edhe vetë Kurti, sa ishte në opozitë.
Tre vite më parë, kur shef i ekzekutivit ishte Avdullah Hoti, tash deputet i Lidhjes Demokratike të Kosovës, Vetëvendosje thoshte se kjo qeveri ishte “Qeveri e Grenellit”, derisa kërkonte shkarkimin e saj.
Ndërkaq kryeministri Kurti, i cili, atëbotë, sapo ishte rrëzuar nga Qeveria, pati akuzuar direkt Grenellin se ka ndikuar në këtë rrëzim.
“Qeveria ime nuk u rrëzua për asgjë tjetër, por thjesht sepse ambasadori Grenell po nxitonte të nënshkruante një marrëveshje me Serbinë”, kishte thënë Kurti.
Fitores së Bidenit ndaj Trump, në zgjedhjet e fundit në ShBA, që nënkuptonte edhe largimin e Grenellit, Vetëvendosje iu pati gëzuar jashtë mase.
Për ta, kjo nënkuptoi deklasim i atij që pati si synim “zhbërjen e trashëgimisë demokratizuese e lirisjellëse të presidentëve Clinton e Bush në Ballkan”. /Reporteri.net/.
