Kryeministri Albin Kurti pas përfundimit të Procesit të Berlinit ka thënë se opsionet që po prezantohen në mënyrë të intensifikuar lidhur me dialogun Kosovë – Serbi, janë avancim.
Kryeministri Albin Kurti pas përfundimit të Procesit të Berlinit ka thënë se opsionet që po prezantohen në mënyrë të intensifikuar lidhur me dialogun Kosovë – Serbi, janë avancim.
Kurti ka thënë se janë në rrugën e duhur për ta diskutuar kornizën e përgjithshme të marrëveshjes.
Ai ka thënë se momenti i ndryshimit ka qenë takimi i 18 gushtit në Bruksel.
“Meqenëse bëhet fjalë për koncepte e nocione universale, siç janë integriteti territorial, sovraniteti e barazia, unë besoj që është shumë e mirë për marrëveshjen përfundimtare për dialogun. Marrëveshja duhet të jetë ligjërisht e obligueshme dhe duhet ta ketë njohjen reciproke në qendër. Unë besoj që ka një lëvizje të duhur nga të ashtuquajturat marrëveshje për zgjidhjen e problemeve të posaçme që shndërrohen në solucione sui generis, te një marrëveshje që është e bazuar në vlerat dhe integrimet evropiane”, ka thënë ai.
Sipas tij, të gjitha propozimet që bazohen në vlera evropiane dhe demokratike, do ta kenë mirëkuptimin dhe angazhimin e tij konkret.
“Ne jemi në shtegun e duhur dhe bazën e mirë, por ka shumë punë që të flitet për ndonjë përmbajtje përfundimtare”, ka thënë ai. “Nuk e di pse nuk ka ardhur (presidenti serb Aleksandar v.j.) Vuçiqi në këtë takim, edhe nuk është që na mungoi fort, ndoshta ndokujt po, por jo mua”.
Kurti ka thënë se arsyeja e mungesës së Vuçiqit mund të jetë pushtimi rus i Ukrainës dhe se presidenti serb do të mbetej i vetmuar, pasi të gjithë në Samit dënuan agresionin rus.
“Siç ka vepruar jo rrallë herë, ai ka sakrifikuar dikë tjetër”, tha Kurti, duke aloduar se Serbinë në Samit e përfaqësoi kryeministrja Ana Bërnabiq.
Ai ka thënë se kanë diskutuar shumë tema në Procesin e Berlinit, por tri marrëveshje janë nënshkruar për të cilat ka thënë se ka dy vjet që i negociojnë.
Kurti ka thënë se kancelari Olaf Scholz është angazhuar shumë tri javët e fundit për këto marrëveshje. Ai ka sqaruar se marrëveshjet e nënshkruara do të ratifikohen nëpër parlamentet e secilit vend.
“Samiti i radhës i Procesit të Berlinit do të mbahet në Tiranë. Kjo tregon vëmendjen e shtuar dhe vëzhgimin e vazhdueshëm që ka BE-ja për vendet e Ballkanit Perëndimor. Neve na ngelet të bëjmë më shumë reforma për marrëveshje për liri të tregut. Kosova ashtu siç është zotuar gjatë këtij viti do të aplikojë për anëtarësim në Bashkimin Evropian”, ka thënë ai.
I pyetur për “Ballkanin e Hapur” Kurti ka thënë se nuk nevojiten alternativa tjera drejt Brukselit përveç Procesit të Berlinit.
Ai ka thënë se të gjithë kanë nevojë për Ballkan Demokratik e Evropian.
