Kryeministri i Kosovës, Albin Kurti në një intervistë dhënë “Deutsche Welle”, ka folur rreth planit franko-gjerman dhe Asociacionit të komunave me shumicë serbe, për të cilin, ka ripërsëritur qëndrimin e tij se është kundër një gjëje të tillë dhe se nuk mund të krijohet.
Derisa po qëndron për vizitë në Paris për Forumin e Paqes, kryeministri në një intervistë dhënë këtij mediumi, ka deklaruar se propozimi franko-gjerman ka bazë të mirë për vijimin e diskutimeve drejt marrëveshjes përfundimtare.
“Propozimi franko-gjerman, që në thelb është propozimi i Brukselit, i mbështetur së tepërmi nga Berlini dhe Parisi, por edhe nga Uashingtoni, është një bazë e mirë për vijimin e diskutimeve për marrëveshjen përfundimtare, që do të thotë normalizim i plotë mes marrëdhenieve mes Kosovës dhe Serbisë, duke pasur në qendër njohjen reciproke. Do të ketë edhe detaje të tjera të kësaj marrëveshjeje, por kryesorja duhet të jetë njohja reciproke. Në këtë propozim, parashikohen gjithashtu edhe diskutimet rreth të drejtave të pakicave, dhe në këtë pikë Beogradi mund të shprehë kërkesën e tij për temën që ata e quajnë Asociacioni i Komunave me Shumicë Serbe, e cila është një formë për të adresuar çështjen e pakicës serbe”, ka thënë ai.
Duke folur për komunat që përbëhen nga komunitetet pakicë, kryeministri Kurti tha se ka mundësi për bashkëpunim ndërkomunal, por jo për Asociacioni mbi baza etnike.
Shefi i Qeverisë së Kosovës ripërsëriti se nuk e pranon Asociacionin mbi baza të identitet etnik, ndonëse kërkesat e partnerëve ndërkombëtarë që kjo të ndodhe janë shtuar, pasi sipas tij kjo bie edhe në kundërshtim me Kushtetutën e vendit.
“Ka një mundësi për bashkëpunim ndërkomunal, por jo për asociacion mbi baza etnike. Unë nuk e kundërshtoj Asociacionin e komunave. Aktualisht, Kosova ka një asociacion komunash, 38 në total. Por unë nuk mund ta pranoj asociacionin mbi bazat e identitetit etnik. Politika mbi bazat etnike nuk është e mundshme. Pra s’mund të krijohet një asociacion mbi baza etnike, sepse kjo bie në kundërshtim me Kushtetutën tonë. Ky fakt është gjithashtu i konfirmuar nga një vendim i Gjykatës Kushtetuese tonës në dhjetor 2016”, ka thënë ai./Gazeta Nacionale
