Kosova nuk do të ofrojë më koncesione ndaj Serbisë që ajo ta ndajë vendin tonë në linja etnike, ka thënë Kryeministri i Kosovës, Albin Kurti, në Forumin e Paqes në Paris.
Kurti tha se në procesin e normalizimit të marrëdhënieve me Serbinë, Kosova është e gatshme “t’ia zgjasë dorën një vendi që ka kryer gjenocid ndaj nesh në qoftë se ata edhe ata janë gati t’i çlirojnë grushtet e tyre”.
Por, ndarje të mëtejme etnike, referencë kjo që kryeministri e përdor për të shënuar Asociacionin e Komunave me shumicë serbe, ai tha se Kosova nuk do të lejojë.
“Kosova ka filluar procesin e normalizimit të marrëdhënieve me Serbinë më 2011 dhe 11 vite më vonë marrëdhëniet nuk janë shumë më të mira se sa para një dekade. Dhe ka një arsye për këtë”.
“Sepse Serbia ka dështuar në demokratizimin e saj dhe kërkon më shumë konflikt se sa bashkëpunim, derisa edhe glorifikon kriminelët e luftës në vend se t’i dënojë e gjykojë. Kam frikë se Serbia nuk është as demokratike dhe as e pavarur në ditët e sotme”, ka thënë Kurti.
“Është një regjim që udhëhiqet nga Kisha Ortodokse dhe dominohet nga Rusia e Putinit. Kosova kërkon marrëdhënie fqinjësore me Serbinë dhe jemi gati të zgjasim dorën për një vend të cilët kanë kruar gjenocid ndaj nesh nëse ata janë gati t’i çlirojnë grushtet e tyre.
“Ajo që nuk ofrojmë më është koncesione për të ndarë vendin tonë në vija etnike. Por, nëse Serbia nuk është gati që të na njohë sepse kështu e kanë thënë, pesë shtete të tjera të BE-së s’kanë çka të presin”.
“Ata mund ta ndihmojnë Serbinë më shpejt në qoftë se ata na njohin më së pari. GJND ka thënë se nuk kemi shkelur të drejtën ndërkomëtare me shpalljen e pavarësisë së Kosovës”, tha kryeministri.
