Kryeministri Albin Kurti të martën ka pritur në takim ambasadorin e Francës në Kosovë, Olivier Guerot.
Në njoftimin e Qeverisë thuhet se në këtë takim është diskutuar edhe për procesin e dialogut si dhe takimin që të martën pritet të zhvillohet në nivel të kryenegociatorëve në Bruksel.
“U bisedua po ashtu edhe për raportet ndërmjet Kosovës dhe Serbisë, për procesin e dialogut, Marrëveshjen bazë dhe aneksin e zbatimit të saj sipas dakordimit të arritur në Ohër më 18 mars, si dhe për takimin e sotëm në Bruksel në nivel kryenegociatorësh”, thuhet në njoftim.
Zëvendëskryeministri i Kosovës, Besnik Bislimi ka udhëtuar një ditë më parë në Bruksel, për takim me shefin e Zyrës për Kosovën në Qeverinë e Serbisë, Petar Petkoviqi.
Ky do të jetë takimi i parë i Kosovës dhe Serbisë pas dakordimit më 18 mars në Ohër të Maqedonisë për aneksin e implementimit të planit evropian, për përmbajtjen e të cilit kryeministri i Kosovës, Albin Kurti, dhe presidenti i Serbisë, Aleksandar Vuçiq, u pajtuan më 27 shkurt në Bruksel.//koha.net
