Ndërkohë që në Kuvendin e Kosovës po zhvillohet një debat i ashpër me ftesë të LDK-së për shtrenjtimin e derivateve, lajmet nga terreni paralajmërojnë një goditje të re për xhepin e qytetarëve.
Kryetari i Shoqatës së Naftëtarëve, Fadil Berjani, në një prononcim për Insajderin, ka zbuluar gjendjen reale të çmimeve këtë të premte, por ka dhënë edhe një paralajmërim shqetësues për ditën e nesërme.
Ndonëse ministrja e Industrisë, Ndërmarrësisë dhe Tregtisë, Mimoza Kusari-Lila, deklaroi sot se çmimi maksimal i lejuar (tavani) është 1.83 euro, Berjani konfirmoi se në pikat e karburantit çmimet aktualisht janë pak më të ulëta.
Megjithatë, ky stabilitet i përkohshëm pritet të thyhet shumë shpejt.
Berjani ka paralajmëruar se lëvizjet në bursa do të reflektohen menjëherë te ne.
Berjani prezantoi edhe shifrat nga vendet fqinje, ku Kosova aktualisht qëndron më mirë se Shqipëria, por ngjashëm me Serbinë e Malin e Zi.
“Shqipëri: Dizelli 2.08 euro, Benzina 2.03euro Serbi: Dizelli 1.80 euro, benzina 1.75 euro, Mal i Zi: Dizelli 1.80 euro, Benzina 1.75euro”, tha ai.
Ndërkohë, Ministrja, Mimoza Kusari-Lila, ka njoftuar sot nga foltorja e Kuvendit se çmimi maksimal i lejuar për shitjen e naftës, sipas marzhës së përcaktuar, është 1.83 euro.
Gjatë fjalimit të saj, ministrja u bëri thirrje të hapur qytetarëve që të jenë vigjilentë dhe të raportojnë çdo rast ku ky çmim tejkalohet nga pikat e karburantit.
“Zyrtarisht sot nafta, sipas marzhës së përcaktuar, mund të shitet me çmimin më të lartë 1.83 euro. Kudo që sot është mbi 1.83 apo 1.84 e më sipër, i lus qytetarët që ta paraqesin rastin në mënyrë që të ndërmerren masa,” u shpreh Kusari-Lila, raporton Insajderi.
