Ka ndërruar jetë Hasime Tahiri, e njohur nga qytetarët si “motra Hasime”, e cila për rreth pesë dekada ia kushtoi jetën profesionit të infermierisë dhe shërbimit ndaj qytetarëve të Podujevës.
Hasimja lindi në vitin 1951 në Kovaçicë, në rajonin e Shalës së Bajgorës. Ajo ishte ndër motrat e para medicinale në Spitalin e Podujevës dhe për dekada u shërbeu pacientëve me përkushtim, humanizëm dhe profesionalizëm, edhe gjatë viteve më të vështira që kaloi vendi.
Gjatë karrierës së saj, ajo u shqua për kujdesin dhe respektin ndaj pacientëve, si dhe për marrëdhënien e mirë me kolegët.
Për kontributin e saj të jashtëzakonshëm në profesion, në vitin 2017, në Ditën Ndërkombëtare të Infermierisë, Oda e Infermierëve, Mamive dhe Profesionistëve të tjerë Shëndetësorë të Kosovës e nderoi me çmimin “Mirënjohje për Veprimtari Jetësore”.
Hasimja ishte e martuar me Ruzhdi Tahirin, ndërsa së bashku rritën dy djem, Besnikun dhe Ilirin.
Për shumë qytetarë të Podujevës, “motra Hasime” do të mbetet në kujtesë si një grua e përkushtuar, humane dhe e palodhur, që për 50 vjet ishte pranë njerëzve në momentet kur kishin më së shumti nevojë.
U prehtë në paqe!
