Deputeti i zgjedhur i LDK-së, Ekrem Hyseni, në një përgjigje për “rtv21” ka thënë se Lidhja Demokratike e Kosovës do t’i përgjigjet pozitivisht ftesës së kryetarit të Kuvendit Glauk Konjufcës për takim me partitë politike për konsulta përgatitore për seancën konstituive të 15 prillit.
Absolutisht po, kjo ftesë e kryeparlamentarit nuk është ftesë e subjektit të LVV-së, por është ftesë institucionale të cilën e rregullon rregullorja e funksionimit të Kuvendit, ku thotë se kryeparlamentari fton partitë në takim konsultativ për të caktuar rendin e ditës dhe njëkohësisht rendin e ditës dhe ulëset e deputetëve dhe çështjet e tjera që funksionojnë në mbarëvajtjen e seancës së parë. LDK-ja do të marrë pjesë në takim me kryeparlamentarin Konjufca, sepse konstituimi i legjislacionit të ardhshëm bëhet përmes rregullores dhe ligjeve në fuqi”, tha Hyseni.
Hyseni tha po ashtu se do të jenë pjesë e seancës së 15 prillit, por nuk do ta përkrahin kandidatin e LVV-së për kryeparlamentar.
Mbledhja mes Konjufcës dhe kryetarëve të partive politike mbahet më 8 prill, nga ora 12:00.
