ADVERTISEMENT
Lidhja Demokratike e Kosovës (LDK) ka reaguar ashpër ndaj suspendimit të dialogut strategjik mes Kosovës dhe Shteteve të Bashkuara të Amerikës, duke e cilësuar këtë si pikën më të ulët të marrëdhënieve me aleatin kryesor të vendit. Në një deklaratë publike, LDK akuzon qeverinë aktuale për shkatërrim institucional, shkelje të Kushtetutës dhe krijimin e një krize të përhershme në vend. Partia bën thirrje për bashkim qytetar dhe rikthim të Kosovës në rrugën euroatlantike, duke u zotuar se do të garantojë miqësinë e përhershme me SHBA-në dhe forcimin e shtetit ligjor e demokratik.
postimi i plotë:
Të dashur qytetarë,
Suspendimi i dialogut strategjik me SHBA-të paraqet pikën më të ulët të relacioneve të Kosovës me aleatin tonë strategjik dhe ekzistencial; si shtet i pavarur e sovran.
Shkatërruesit e shtetit, bllokuesit historik, shkelësit e Kushtetutës, ligjeve e normave morale njerëzore, kanë zgjedhur të ndërtojnë rrugëtimin e tyre mbi krizën e përhershme, mbi frikën e pashtershme dhe mbi fatkeqësinë e Republikës.
Populli i Kosovës nuk është si ta.
Populli i Kosovës nuk do të jetë si ta.
Është koha të bashkohemi të gjithë; t’i japim fund kësaj çmendurie politike dhe të ndërtojmë shtetin që e kemi merituar gjithmonë – para se të bëhet vonë për të gjithë.
LDK do të kujdestarojë me plot përkushtim e përgjegjësi rrugën euroatlantike të Kosovës; do të garantojë miqësinë e përhershme me SHBA-në dhe do të rikthejë vendin tonë në binarët e arsyes, ligjit dhe demokracisë.
Le t’i japim dritë Republikës sonë të përhershme!
