Për të penguar punën e kryetarëve të rinj në katër komunat veriore, serbët sot lëshuan alarmin dhe u grumbulluan para objekteve komunale që t’u ndalonin hyrjen atyre.
Por, kundërshtimin duket se s’do ta lënë me kaq.
Burimet e Gazetës Express bëjnë me dije se po vërehen lëvizje të shtuara të kamionëve në pjesë të ndryshme të veriut, në lokacionet ku zakonisht i vendosin barrikadat. Ata pritet që të vendosen në rrugët kryesore.
Ndërkaq, serbët kanë hedhur zhavorr në afërsi të Komunës së Leposaviqit në përpjekje për ta bllokuar rrugën në afërsi të objektit.
Për këto veprime, Lista Srpska paralajmëroi tensione.
Duke reaguar pas betimit të Kryetarit të Mitrovicë së Veriut Erden Atiq, kjo parti, pa ofruar prova, ka paralajmëruar serbët nga 1 qershori, “do ta mbrojnë veten me të gjitha mjetet” për të ndalur represionin.
Pjesëtarët e Policisë së Kosovës kanë rrethuar sot para mesditës ndërtesat e komunës Zubin Potok, Zveçan dhe Leposaviq, pas së cilës kanë rënë sirenat e alarmit.
Në një moment policia i ka shpërndarë serbët e mbledhur me gaz lotsjellës dhe granata trullosëse.
Pas incidenteve në Zveçan, KBC Kosovska Mitrovica ka pranuar disa qytetarë të cilët kanë pësuar lëndime nga bombat shokuese dhe gazi lotsjellës.
