Kryetari i Nismës Socialdemokrate, Fatmir Limaj, ka thënë se Qeveria Kurti ka vepruar me arrogancë dhe pa shpresë, duke marrë si shembull rrugën Prishtinë-Podujevë, e cila, sipas tij, është dëshmia më e mirë e keqqeverisjes, mos përgjegjësisë dhe mungesës së vizionit.
Gjatë një takimi në Lluzhan të Podujevës, Limaj u shpreh se kjo qeveri ka dështuar në realizimin e premtimeve dhe se ka treguar mungesë angazhimi për zhvillimin e infrastrukturës dhe përmirësimin e kushteve për qytetarët.
“Rruga Prishtinë-Podujevë është dëshmia më e mirë e keqqeverisjes, mos përgjegjësisë dhe arrogancës, pa vizion dhe pa shpresë, ky është përshkrimi i rezultateve të kësaj qeverie,” shkroi Limaj në Facebook.
Ai u shpreh se rreshtimi rreth koalicionit “Për Kosovën Fituese, veç VEPRA” është e vetmja mundësi për të siguruar zhvillim të qëndrueshëm për vendin, anëtarësim në NATO dhe pavarsim energjetik, duke ofruar një të ardhme më të mirë për qytetarët e Kosovës./Insajderi
