Kryetari i Nismës Socialdemokrate, Fatmir Limaj, tha se opozita nuk duhet të ndihet e pafuqishme përballë Qeverisë Kurti, kjo pasi 50% të qytetarëve të Kosovës nuk e kanë votuar këtë qeveri.
”Popull opozitar që është kundër këtyre politikave është 50% të paktën e kanë thënë rezultatet zgjedhore dhe ata njerëz presin të përfaqësohen, a e ndjejnë sot njerëzit opozitar veten të përfaqësuar në parlament? A e ndjejnë ata qytetarë që e kanë votuar për votën opozitare veten të përfaqësuar në parlament? Sipas meje ky duhet të jetë preokupimi i opozitës, jo se çfarë thonë ata tjerët, se ne pak a shumë e dimë çka thonë ata tjerët”, tha Limaj në Rubikon të Klan Kosovës.
Limaj tutje tha se opozita e ka përballë një parti e cila e ka mohuar shtetin e Kosovës.
”Opozita nuk duhet të ketë kompleks, ata njerëz që janë sot në opozitë duhet të ndihen krenar që e kanë bërë Kosovën shtet në kohën kur ata që i kanë përballë e kanë mohu shtetësinë. Sikur të isha në parlament për gjashtë muaj e kisha çmontu atë, sepse unë jam krenar me atë që e kam bërë për vendin tim. Opozita parlamentare duhet ta ketë parasysh që përballë e ka një grup që e ka mohu shtetin, që e ka mohu procesin e
Rambujesë, e ka mohu Vjenën, duke thënë s’ka shtet Kosova, s’ka ushtri Kosova, s’ka liri Kosova, e ka keqpërdorë flamurin kombëtar, e ka keqpërdorë bashkimin kombëtar, se ka shpifë, e mashtru, e fëlliqë, e përça këtë popull me shpifje e mashtrime”, përfundoi Limaj.
