Stefan Stojanoviq, 11-vjeçari që u plagos në afërsi të Shtërpcës më 6 janar, është liruar nga spitali për të vazhduar mjekimin në shtëpi.
Nëna e tij, Zorica Stojanoviq, ka konfirmuar për televizionin publik serb se djali i saj është liruar sot nga spitali në Graçanicë.
Ajo deklaroi se djali i saj është mirë me shëndet dhe se po bashkohet me pjesën tjetër të familjes.
Njëzetenjë vjeçari që po ashtu u qëllua me armë zjarri në Shtërpcë, është liruar nga spitali në Graçanicë për mjekim shtëpiak më 9 janar.
Gjendja e të riut të plagosur ishtestabile dhe ai do të mund t’i nënshtrohet kontrolleve mjekësore në Shtëpinë e Shëndetësisë në Shtërpcë, i kanë thënë mjekët nga Graçanica babait të të riut, sipas raportimeve të mediave serbe në Kosovë.
Stefan Stojanoviq, 11-vjeçar, dhe Millosh Stojanoviq 21-vjeçar, mbetën të plagosur më 6 janar.
Gjykata Themelore në Ferizaj, më 8 janar, në bazë të kërkesës së Prokurorisë, ka caktuar një muaj paraburgim për pjesëtarin e FSK-së, A.K, që dyshohet se kreu plagosjen. /Express/
