Lëvizja Vetëvendosje ka dorëzuar sot zyrtarisht ankesë në Panelin Zgjedhor për Ankesa dhe Parashtesa kundër vendimit të Komisionit Qendror të Zjgehdjeve (KQZ) për certifikimin e subjektit politik, Lista Serbe.
Në një komunikatë për media të enjten, Vetëvendosje tha se vendimi për certifikimin e Listës Serbe është kontrabanduar kundërligjshëm në mbledhjen e fundit të KQZ-së.
“Ditë më parë KQZ në mënyrë të paprecedent dhe në kundërshtim me Ligjin për Zgjedhjet e Përgjithshme, e lejoi Listën Serbe që të marrë pjesë në zgjedhje”, thuhet në komunikatën e Lëvizjes Vetëvendosje. “Sot, Lëvizja VETËVENDOSJE! ka dorëzuar përmes postës ankesë në PZAP kundër vendimit për certifikimin e Listës Serbe në emër të KQZ-së, me kërkesën për anulimin e këtij vendimi”.
Vetëvendosje tha se vendimi duhet t’i nënshtrohet votimit në KQZ.
“Ky vendim nuk është i KQZ-së, sepse nuk është votuar. Është i paligjshëm, sepse bie ndesh me Ligjin për Zgjedhjet e Përgjithshme. Ndërsa Lista Serbe nuk është certifikuar në përputhje me Ligjin, por është kontrabanduar kundërligjshëm”, tha Vetëvendosje.
Sipas LVV-së, Lista Serbe vazhdon të mbetet partia e Millan Radoiçiqit, organizatorit të sulmit terrorist në Banjskë.
“Lista Serbe ka qenë dhe mbetet partia e kryeterroristit Radojçiq. Ajo dikur përdorej nga Radojçiqi kundër shtetit të Kosovës, kurse tani po shërben si struktura që mbron dhe amniston terrorizmin”, thuhet në komunikatë.
Dy ditë më parë, KQZ-ja mori vendim për certifikimin e Listës Serbe për zgjedhjet parlamentare të 9 shkurtit, pasi Gjykata Supreme e hodhi poshtë si të palejuar ankesën e partisë në pushtet kundër certifikimit të partisë më të madhe të serbëve në Kosovë, Lista Serbe.
