Përkrahësi i Lëvizjes Vetëvendosje, Riza Dembogaj, është emëruar Sekretar/Këshilltar i Përgjithshëm në KEK.
Kjo procedurë e zgjedhjes vlerësohet e kundërligjshme, marrë parasysh se Korporata Energjetike e Kosovës ka shkelur udhëzimet administrative për punësimin në sektorin publik, shkruan Demokracia.com.
Korporata Energjetike e Kosovës kishte shpallur konkurs për këtë pozitë më 29 gusht 2022, me numër 5123 dhe me afat të konkursit deri më 20 shtator 2022.
Nga përfundimi i konkursit, aplikantët nuk ishin njoftuar me procedurat e mëtutjeshme, duke shkelur Udhëzimin Administrativ për Rregullimin e Procedurave në Sektorin Publik 07/2017.
Duke vazhduar me shkelje procedurale, Korporata Energjetike e Kosovës kishte shpallur konkurs të njëjtë përsëri më 12 tetor 2022, me numër 6134, pa anuluar konkursin paraprak dhe pa dhënë asnjë arsyetim të kandidatët që kishin aplikuar. Krejt këto shkelje i bëri vetëm për të ardhur në pozitë i zgjedhuri Riza Dembogaj, i cili në kohën e qeverisjes Kurti I ishte emëruar UD sekretar.
Në njoftimin e KEK-ut dërguar kandidatëve thuhet se procedura ka qenë transparente dhe ka qenë në mbikëqyrje të organizatës GAP, INDEP GLPS.
Demokracia.com ka mësuar nga burime brenda komisionit se njëri nga kandidatët kishte shkuar në intervistë, por nuk kishte pranuar të intervistohet për shkak të shkeljes së procedurave ligjore dhe me arsyetimin së KEK-u kishte dërguar të kopjuar udhëzuesin për intervistë. Sipas tij, udhëzuesi ka qenë i njëjti për kandidatë të Bordit të Drejtorëve të Ndërmarrjes Publike (KEK) dhe detyrat e përgjegjësitë e sekretarit dallojnë nga detyra e Bordit të Drejtorëve.
Bordi i Drejtorëve kishte kërkuar nga kandidatët që në afat prej 7 minutash të tregojnë për 3 sfidat që përballet KEK-u dhe si të zgjidhen ato, në kundërshtim me detyrat e sekretarit.
Në vendimin e lëshuar nga Bordi i Drejtorëve të KEK-ut, kandidatët për intervistë kanë qenë:
Shqiprim Pula më 18 pikë
Blerim Bala —
Riza Dembogaj 20.75 pike
Erza Tullumi 11.25.
Vendimin e komisionit nuk e ka nënshkruar anëtari Valdrin Krasniqi, ndërsa e kanë nënshkruar anëtarët e tjerë, që janë Skënder Haziri, Valbona Raifi, Nagip Krasniqi dhe Mustafë Pllana.
Riza Dembogaj ishte emëruar ushtrues detyre në zyrën ligjore në KEK në Qeverinë Kurti I. Nga kjo pozitë ai ishte shkarkuar tri vjet më parë. Dembogaj që ishte larguar nga puna që e mbante në Inspektoratin Policor të Kosovës, ditën që partia e Albin Kurtit mori pushtetin kishte shkruar: “Efekti i qeverisë së re qysh në ditën e parë. Hajnat, abuzuesit e parasë publike, kapësit e shtetit dhe shkelësit e ligjit janë në panik”, kishte shkruar asokohe ai. /Demokracia.com/
