Kryeministri i Kosovës, Albin Kurti në mbledhjen e sotme të Qeverisë ka folur për situatën në veri e krijuar pas dorëheqjeve të fundit të serbëve nga institucionet.
Kurti ka thënë se qytetarët serbë në veri po përballen me sulme dhe kërcënime dhe kjo është dëshmi se çka prodhon mosundimi i ligjit.
Ai u ka bërë sërish thirrje serbëve që të mos bojkotohen e braktisen institucionet e vendit.
“Sundimin e ligjit e kemi përgjegjësi programore, por edhe obligim institucione. Ne duam sundim të ligjit sepse duhet sundim i ligjit. Nuk është zgjedhje, është detyrim. Mungesa e tij është kërcënim për të gjithë. Me këtë kërcënim më së shumi po ballafaqohen qytetarët tanë në katër komunat në veri. Presioni dhe sulmet ndaj tyre nga banda e individë kriminal janë vet dëshmi se çka prodhon mungesa e sundimit të ligjit. Problemi i tyre nuk janë vendimet tona, as afatet që parashihen në to. Problemi i tyre janë sulmet me bomba, djegja e veturave dhe shtëpive. Ata që po urdhërojnë braktisjen e in të Kosovës janë ata që ju pengon ligjshmëria e kushtetutshmëria, luftimi i krimit dhe korrupsionit. Ne jemi qeveri e përgjegjshme e të gjithëve kundër kriminelëve e përkushtuar për barazi të drejta dhe shërbim ndaj qytetarëve pa dallim. Bëj thirrje edhe një herë që të mos bojkotohen e të mos braktisen institucionet”, tha Kurti në mbledhjen e Qeverisë.
Kurti ka njoftuar se deri sot janë lëshuar 1 mijë e 12 qortime, duke shtuar se nuk është shënuar asnjë incident dhe asnjë ankesë nuk është regjistruar.
“Problemi i tyre nuk janë vendimet tona e as afatet që parashihen në to. 1,012 vërejtje janë lëshuar deri sot në mëngjes, asnjë incident i shënuar dhe asnjë ankesë e regjistruar. Problemi i tyre janë sulmet me bomba, djegiet e veturave dhe shtëpive, trysnitë dhe kërcënimet pa afat nga ta që e kanë problem ligjin. Ata që po urdhërojnë braktisjen e institucioneve te Kosovës, janë ata të cilëve ju pengon ligjshmëria e kushtetutshmëria, luftimi i kriminalitetit dhe i korrupsionit në vendin tonë”, tha Kurti.
