Fondi për të Drejtën Humanitarë në Kosovë po e sheh shqetësues rënien e numrit të të akuzuarve për krime lufte në Kosovë. Sipas këtij institucioni, në vitin 2021 dhe 2022 janë ngritur vetëm 5 aktakuza. Shqetësuese po shihet edhe numri i vogël i prokurorëve të specializuar. Ndërkaq, familjarët e viktimave dhe të zhdukurve thonë kanë filluar ta humbin shpresën ndaj institucioneve të drejtësisë.
Për krimet e luftës në Kosovë, më shumë janë dënuar shqiptarë, sesa serbë.
Nga 74 persona që janë gjykuar për 24 vjet, 38 prej tyre janë shqiptarë, ndërsa vetëm 32 serbë.
Derisa, shumë kriminelë serbë për masakrat e shumta në Kosovë vazhdojnë të jenë të lirë dhe të pakapshëm për organet e drejtësisë.
Ndërkaq, edhe numri i aktakuzave është mjaft i vogël, ku deri më tani janë ngritur 215 të tilla.
Megjithatë, nga Fondi për të Drejtën Humanitare thonë se çdo vit numri i personave ndaj të cilëve po ngrihet aktakuzë për krime lufte është në rënie.
Sipas avokatit, Artan Qerkini, shqetësues është numri i vogël i prokurorëve të specializuar për këtë fushë, derisa thotë se do të ishte e udhës që Gjykata Speciale ta kishte mandatin që të merrej me krimet e serbëve ndaj popullatës shqiptare.
E kjo situatë edhe më shumë po i rëndon dhimbjen e familjarëve të viktimave dhe të të zhdukurve.
Drejtuesi i Këshillit për të Zhdukurit dhe Krimet e Luftës, Ahmet Graiqevci thotë se derisa kriminelet po shëtisin lirshëm, institucionet e drejtësisë po vazhdojnë të jenë në gjumë.
Aktualisht, vetëm 8 perona janë duke u gjykuar në Gjykatat e Kosovës.
Ndryshe, në vitin 2021, për krime lufte janë ngritur vetëm tre aktakuza, derisa më 2022 janë arrestuar edhe tre serbë të dyshuar.
Ndërkaq, para pak ditësh, është arrestuar edhe një serb i cili dyshohet për krime lufte ndaj popullatës civile shqiptare në Kamenicë.
