Mafia shqiptare po behet sunduese tashmë edhe në Greqi, por kjo mafi e cila ka dekada që kryen veprimtari kriminale në Euroje, ka shtrirë rrënjët e saj deri në Oqeanin Paqësor në ishujt Galapagos.
Gazeta e përditshme greke “To Vima” shkruan se mafia shqiptare po fiton luftën e krimit të organizuar në Greqi, e cila jep në këtë mënyrë dhe alarmin për rritjen e paprecedentë të krimit shqiptar në shtetin helen. “To Vima”, thekson se me sulme vrastare, zhvatje, trafik droge, po përshkallëzohet aktiviteti i organizatave kriminale që drejtohen nga burgjet. Po ashtu, ajo ngre shqetësimin edhe të rekrutimeve të reja dhe shtimin e kallëzimeve për policë të përfshirë në këto rrjete betuar, ndërsa ngre pyetjen se “Kush po heton EL.AS. për sulmin në Nea Smyrni?”.
Pesë bandat shqiptare që dyshohet se operojnë nëpër burgje në Greqinë Qendrore dhe Jugore janë përgjegjëse, sipas zyrtarëve të lartë të EL.AS, për sulmet e përgjakshme që po ndodhin para qytetarëve muajt e fundit në Athinë.
Vrasja e dyfishtë e dy shqiptarëve, pak ditë më parë, në një dyqan plot me njerëz në Smyrna e Re konsiderohet si një shembull i ri i qartë i rritjes, zgjerimit dhe demonstrimit të fuqisë së mafisë shqiptare në Greqi. Zgjerimi i kryer nga rekrutimi i përmbaruesve të rinj, disa prej të cilëve konsiderohen “të shtrenjtë”, me sulme kryesisht në vende publike dhe me një cikël të ri konfliktesh që lidhen me “dërgesa të humbura droge”, dorëzimet në Polici, zgjerimi i “çifteve”, bashkëpunëtorë të paqëndrueshëm dhe mos pagesë të arkëtimeve. EL.AS. po shqyrton seriozisht mundësinë që sulmi në Nea Smyrni të lidhet me vrasjen e ndodhur në maj 2021, të një krimineli shqiptar 32-vjeçar në një kafene në Sepolia, ku nuk përjashtohet mundësia se ndoshta është i njëjti autor.
Për më tepër, ka prova të qarta se shumë nga sulmet e tanishme kriminale vijnë nga kriminelët shqiptarë, shumica e të cilëve mbeten të burgosur, të cilët ishin të lidhur me një bandë të madhe shqiptare që vepronte nga vitet 2004 – 2008 në qendër të Athinës dhe gjetkë dhe ishte përgjegjëse për 11 vrasjet.
Oficerët e EL.AS, madje kanë gjetur “video” të mafiozëve shqiptarë në Athinë, duke demonstruar kallashnikovë, përplasje me policët e DIAS-it, ndërsa disa prej tyre shfaqen si truproja të këngëtarëve të rinj të huaj të muzikës rap. Madje në një nga këto “videoklipe” ata kërcënojnë policët duke thënë se “e dinë se ku jetojnë”. Ky përshkallëzim i aktivitetit të mafisë shqiptare në Greqi është shënuar në të njëjtën kohë që janë hartuar raportet e Europolit. Sipas tyre, janë aktive 15 organizata kriminale qendrore të shqiptarëve dhe “degët” e tyre, të cilat kanë lidhje me trafikun e kokainës (ky aktivitet lidhet me shumicën e vrasjeve në Greqi) me Ndraghettën dhe Kamorrën në Itali dhe me rrjete kriminale në Kolumbi, Marok, Santo Domingo, Spanjë dhe gjetkë. Përveç kësaj, në trafikun e heroinës ata kanë kontakte me mafien italiane të Pulias.
Shërbimet kompetente të Katehaki Avenue raportohet se tashmë kanë hartuar degët dhe drejtuesit e mafisë shqiptare në Greqi. Nga hetimet e EL.AS. për krimin e organizuar është përcaktuar se në Greqi ka rreth 2500 anëtarë të grupeve kriminale ku të ardhurat e tyre janë marramendëse ku arrijnë deri në 300 milionë euro dhe kjo shifër i përket vetëm rasteve të hetuara nga EL.AS. 10-15% e aktivitetit kriminal lidhet vetëm me veprimtarinë e bandave shqiptare. Importet masive të kokainës në Greqi, që kalojnë 10-15 tonë në vit, kapin vlerën e më shumë se 500.000.000 euro. 26% është përfshirja e bandave shqiptare në trafikun e heroinës, 31% në trafikun e hashashit. EL.AS shqyrton tërësisht nëse pas “luftës civile” të mafisë shqiptare mund të fshihet një grup qendror banditësh që ka marrë emrin e një qendre nate në Athinë.
Sipas disa të dhënave nga hetimi i policisë, një personazh kryesor mund të jetë një kriminel i njohur shqiptar, i burgosur në Greqinë Qendrore, i cili ishte akuzuar për “kontrata vdekjeje” dhe arratisje. Por mafia shqiptare e ka shtrirë veprimtarinë e saj deri në Ekuadorin kontinental në ishujt e Paqësorit në Galapagos. Gjeneral Pablo Ramirez, drejtor në policinë e Ekuadorit ka theksuar se mafia shqiptare ka dekada që kryen veprimtari kriminale në Evropë, ndërsa shton se janë shtrirë edhe në ishujt Galapagos.
“Kemi parë që mafiozët ballkanas dhe ato shqiptarë kanë hyrë lehtësisht nën një fasadë, për të krijuar kompani të paligjshme importi dhe eksporti. Është një klan mjaft i mbyllur, kanë disa dekada që kryejnë veprimtari kriminale në Evropë dhe më pas kanë ardhur në vendin tone, por janë shtrirë edhe në ishujt Galapagos”, ka deklaruar Gjeneral Pablo Ramirez për mediat ekuadoriane.
Gjenerali Ramirez ka deklaruar se policia dhe organet e sigurisë në Ekuador tashmë kanë një hipotezë që po vërtetohet.
“Strukturat kriminale në Ekuador po kthehen në mikrokartele, sepse nuk kërkojnë më vetëm sigurinë e karteleve të mëdha, por edhe transportin e duhur, sigurinë, grumbullimin dhe mikrotrafikimin. Ata gjithashtu përpiqen të merren me tregtinë ndërkombëtare të drogës. Për këtë arsye, brenda këtyre linjave hetimore kemi parë persona të kombësisë shqiptare apo ballkanike , të cilët kanë kryer veprime të ndryshme përmes fasadës së kompanive eksportuese. Në këtë mënyrë gjenerojnë aktivitete të paligjshme, prandaj është e rëndësishme të vendosim jo vetëm një linjë kontrolli për Policinë, por edhe për të gjitha organizatat qeveritare, shtetërore, jo shtetërore dhe joqeveritare, duhet të bashkohemi kundër kësaj të keqeje”, deklaroi Gjeneral Pablo Ramirez.
Në luftën kundër narkotikëve, Gjenerali Ramirez ka pohuar se ka tre partnerë strategjikë që janë SHBA-të, Mbretaria e Bashkuar dhe BE-ja.
“Kemi tre partnerë strategjikë. Nga njëra anë, Shtetet e Bashkuara dhe nga ana tjetër Mbretëria e Bashkuar, që na lejon të forcojmë paktin, nëpërmjet Bashkimit Evropian. Dy javë më parë, një delegacion i rëndësishëm nga Holanda dhe Belgjika ndodhej në Ekuador, për të specifikuar programet e bashkëpunimit për shkëmbimin e informacionit për dërgesat, për të çmontuar strukturat kriminale në vendet e destinacionit, veçanërisht në Holandë, Belgjikë dhe Spanjë. Në këtë trend vitet e fundit po inkorporohet edhe kontrolli i të huajve me kombësi shqiptare, të cilët nuk do të mund të hyjnë pa vizë”, deklaroi Gjeneral Pablo Ramirez, drejtor në policinë e Ekuadorit.
