Kryetari i Partisë Demokratike të Kosovës, Memli Krasniqi ka qëndruar sot në Prekaz, ku ka bërë homazhe në Kompleksin Memorial të familjes Jashari, në 25 vjetorin e rënies së tyre dhe “Epopesë së UÇK-së”.
Krasniqi, përmes një postimi në Facebook, është shprehur se datat 5, 6 dhe 7 mars shënojnë ditët e lindjes së lirisë së Kosovës.
“Ditët e “Epopesë së UÇK-së” ndryshuan drejtimin e historisë tonë dhe, njëkohësisht, u shndërruan në ditët më të lavdishme të historisë tonë kombëtare. Në Prekaz, më 1998, në kullat e familjes Jashari, u bënë bashkë qëndresa, sakrifca, dhembja, krenaria, atdhedashuria dhe heroizmi i rrallë, për të ndezur flakën e shenjtë të lirisë. Në tri ditët e heroizmit të pashoq të familjes Jashari, në altarin e lirisë ranë 59 dëshmorë, duke u bërë themel i shtetit tonë të lirë e të pavarur”, shkruan kreu i PDK-së.
