Në Komisionin për Administratë Publike, është duke u shqyrtuar Projektligji për Zyrtarët Publikë dhe ai për Pagat në sektorin publik.
Në këtë Komision është duke marrë pjesë edhe Ministri i Brendshëm, Xhelal Sveçla, shkruan Reporteri.net.
Nga Partia Demokratike kanë thënë se nuk kanë votë pro këtij projektligji. Deputeti i PDK-së, Mërgim Lushtaku tha se me këtë projektligj Qeveria po i “shkatërron” shërbyesit civilë.
Ai tregoi edhe një mesele me një ministër, që Sveçlës nuk i pëlqeu.
“Në një kohë kur gjyshi i tregon nipit për luftën e Dytë Botërore, si kanë shpëtuar dhe i thotë disa i pushkatojshin disa i përdhunojshin. Nipi e pyet, po ty gjysh a të pushkatuan a të përdhunuan, gjyshi tha mu më pushkatuan. Edhe ti me këtë ligj bashkë me qeverinë i keni pushkatuar nëpunësit publikë. Kemi shkelje flagrante të drejtat e nëpunësve publikë”, tha Lushtaku.
E Sveçla u përgjigj se nuk ka “vakt për mesele” .
Unë me të tregu të drejtën nuk kom vakt për mesele. Derisa ne jemi në qeverisje administrata publike duhet me punu. Nuk do të ketë vakt për mesele. Unë kam qenë deputet. Deputetët e kanë pak atë luks, por me i karakterizu administratën publike si një prej grupeve më të rëndësishme të shoqërisë tonë nëpër mesele edhe fyese mendoj që nuk është e drejtë. Nuk është në rregull as me keqpërdorë tragjedinë, jo vetëm familjare por edhe shoqërore. Nuk është e çuditshme. Sa i takon çështjes në fjalë karrierë nuk është betonimi i disa personave nëpër pozita të caktuara dhe mbajtja e tyre me çdo kusht. Karrierë është zhvillimi i individit e profesionistit, zhvillim i vazhdueshëm dhe në rastet kur ka ngecje në këtë zhvillim, e mos të flasim për keqpërdorim atëherë ai nuk mund të falë për karrierë. Askujt nuk ia kemi ndalë karrierën, por duhet ta hekim këtë betonim, kur dikush fiton një pozitë dhe pastaj në këtë pozitë pavarësisht ngecjeve në rezultate edhe betonohet. Administrata nuk është duke performu kënaqshëm për sfidat dhe me të cilat shteti ynë po ballafaqohet”, tha Sveçla.
