Ministri Aliu prononcohet për ndërtimet e rrugëve Prishtinë-Pejë dhe Prishtinë-Gjilan

Ministri i Mjedisit, Planifikimit Hapësinor dhe Infrastrukturës, Liburn Aliu, ka dhënë detaje mbi projektet e ndërtimit të rrugëve Prishtinë-Pejë dhe Prishtinë-Gjilan në një konferencë për media.

Ministri k ainformuar se projekti Prishtinë-Pejë ka ndryshuar nga ai që ka qenë, pasi sipas tij “ai fillestar ka qenë me devijime të shumta”.

“Do të kemi konferencë për media sërish së shpejti për detajet e këtyre dy projekteve se deri ku kanë avancu dhe për projekte të reja që jemi në zhvillim e sipër gjatë këtyre muajve deri sa të fillojë sezona e ndërtimit, në mënyrë që të kryhen të gjitha procedurat e prokurimit. Për të dyja projektet jemi në procedurë të prokurimit, gjithçka është duke shku në rregull dhe sipas kohës” ka thënë Aliu.

“Sa i përket autostradës Prishtinë-Gjilan, jemi duke punuar me intensitet të shtuar këtë vit. Mendoj që gjatë këtij viti do të arrijmë bukur shumë, se nuk premtoj që do ta përfundojmë këtë vit. Planin e kemi mbase që vitin tjetër të përfundojë. Por përpjekje jemi duke bërë që sa më shpejt ta realizojmë. Sa i përket segmentit deri në Dheun e Bardhë, me të arriturat dhe përfundimet të pjesës së autostradës deri në Gjilan, do të vazhdojmë menjëherë me projektin, me procedurë dhe realizim deri atje” shtoi Aliu.

“Krahas projekteve tjera që kanë të bëjnë me kyçjet nëpër korridore, sikur ai i Durrësit, edhe projekti që e lidhë Prishtinën me Bujanoc është projekt i rëndësisë së veçantë.”

Ministri i Mjedisit ka folur edhe për strategjinë për menagjimin e deponive të mbeturinave, sidomos atyre të ndërtimit.

“Fatkeqësisht, një pjesë e madhe e mbeturinave deponohen jashtë deponive regjionale. Kjo është gjendja me të cilën jemi duke u marrë seriozisht” ka shtuar Aliu./Demos/