Kuvendi i Kosovës ka miratuar në lexim të dytë ndryshimet në Ligjin për Buxhetin për vitin 2023, ku i përfshirë është edhe koeficienti për pagat në vlerë prej 105 euro.
Pro këtij projektligji ishin 63 deputetë, ndërsa ligji u miratua me procedurë të përshpejtua, ku pasdite ky projektligj u miratua në parim, ndërsa me mocion të mazhorancës, i njëjti u votua në lexim të dytë në seancën që nisi nga ora 20:00, shkruan Gazeta Online Reporteri.net.
Në lidhje me vlerën e koeficientit, opozita propozoi që ajo të rritet deri në 132 euro, por kundër ishte mazhoranca.
Kujtojmë se buxheti i përgjithshëm për paga në sektorin publik për vitin 2023 do të jetë 745 milionë euro.
Me Ligjin e ri për paga, është bërë një kategorizim i koeficienteve nga 2 deri në 18. Koeficienti më i lartë, që rrjedhimisht nënkupton edhe pagën më të madhe, sipas këtij ligji, i takon presidentes së shtetit.
Vlera e koeficientit për paga u bë publike në ditën e parë të shkurtit. Kryeministri i vendit, Albin Kurti, deklaroi në mbledhjen e Qeverisë se koeficienti do ta ketë vlerën 105 euro, duke premtuar se vitin e ardhshëm do të rritet në 110 euro.
Këtë koeficient Kurti e ka arsyetuar duke e cilësuar si sistem të përllogaritjes për barazi dhe ndershmëri për pagat në mes të kategorive.
Me t’u bërë i ditur koeficienti, pati pakënaqësi të shumta nga opozita, të cilët vlerën e tij e konsideruan mjerim për qytetarët. /Reporteri.net/.
