Kandidatja e PDK-së për deputete, Vlora Çitaku ka kritikuar ashpër kryeministrin Albin Kurti.
Ajo ka thënë se në ditën e Krishtlindjeve, qytetarët pranuan dy “dhurata” nga qeveria e prirë nga Kurti.
“E para, ndërprerjet e gjata të energjisë elektrike shoqëruar me faturat astronomike për qytetarët tanë, dhe e dyta, paralajmërimet apokaliptike të Kryeministrit për sulme nga Serbia”, ka shkruar sekretarja e përgjithshme e PDK-së.
“Pra, mantra e vetme operuese e kësaj kaste udhëheqësish është mbjellja e pasigurisë, paparashikueshmërisë, dhe frikës. Turp kryeministër. Keni ardhë në detyrë me mandat të fuqishëm për të zgjidhur probleme, jo për tu bërë falltor”, ka shkruar ajo.
Ajo ka thënë se detyrë e kryeministrit është që të ketë energji elektrike dhe t’i parandalojë sulmet.
“Kryeministër, detyra e juaj është t’i mbani dritat ndezur, t’i parandaloni sulmet, dhe të krijoni ambient të sigurtë. E jo të na thuani “shujë, se mundet me u ba edhe ma keq”. Jo. Kosova mundet ma mirë”, ka shkruar Çitaku.
