Sinjali mëson se Syla është dërguar në Emergjencë, ku edhe po merr trajtimin e nevojshëm mjekësor.
E gjithë ngjarja dyshohet se ka ndodhur pak minuta pas përfundimit të emisionit ‘Pressing’ në T7, ku Syla është panelist.
Menjëherë pasi ai ka dalë nga zyrat e televizionit, tre persona dyshohet ta kenë ndjekur nga pas dhe e kanë sulmuar në kafenenë ‘Image’ duke i shkaktuar lëndime të lehta në kokë.
Por cila mund të ketë qenë arsyeja për sulmin fizik ndaj tij?
Gjatë ditës së sotme gazetari Syla ka bërë tetë reagime në llogarinë e tij në Facebook, lidhur me veturën luksoze që mori si dhuratë nga disa besimtarë hoxha nga Prizreni, Mazllam Mazllami.
Ndër të tjera, Syla ka publikuar dy video me përshëndetje për hoxhën Mazllami, teksa në sfond dëgjohet një këngë ‘o me Mercedes, o me aeroplan, ta shëtisim botën ne të dy moj xhan’.
“Një përshëndetje për Mulla Mercedesin Mazllumin nga unë. A je benz a je dizell?”, kishte shkruar Syla bashkëngjitur me videon.
E në videon tjetër, ai ka bërë një përshëndetje për Bashkësinë Islame.
“Një përshëndetje për BIK’un. Në mënyre të vecantē për xhematin e mercedesit, në stilin islamik arabik, të shqipëruar nga unë”, shkroi ai.
Kujtojmë që Syla ishte sulmuar edhe para disa vitesh në lagjen Pejton të Prishtinës, pasi në vazhdimësi kishte bërë komente për mërgimtarët, duke i quajtur ata ‘gërrnaqa’.
