Rrustem Mustafa, ish-komandant i UÇK-së në Zonën Operative të Llapit, është bërë për disa çaste “kryeministër i Kosovës”. Në fakt, ai ka shkruar një letër që e ka titulluar “Në vend të Kryeministrit!”. Mustafa ka kërkuar që ish-krerët e UÇK-së, që po gjykohen në Hagë, të lirohen dhe të kthehen në atdhe.
“Të lirohen me procedurë të rregullt dhe të kthehen në atdhe mbi premisat e së vertetës se vendimi për themelimin e giykatës u bë nën presion të vendeve të bllokut të erret politik dhe ushtarak që i printe Rusia.” – shkroi ai.
Në shkrimin e tij, ish-komandant Remi ka shtruar edhe një kërkesë, që më shumë duket një urdhër, në drejtim të Gjykatës Speciale. Sipas Mustafës, Gjykata Speciale duhet të mbyllë të gjitha “të pavërtetat e prodhuara e drejtë të UÇK-së”.
Tutje, Mustafa e dha edhe një ide se çfarë angazhime të reja duhet të marrë kombi shqiptar.
“UÇK dhe e vërteta!
Gjykata Speciale duhet t’mbyllë gjithë ato të pa vërtetat e prodhuara për luftën e drejtë të UÇK-së, Kombi Shqiptar të marrë përsipër angazhime të reja racionale dhe zhvillimore…
UÇK për shkak të kauzës së drejtë për çlirimin e Kosovës nga makineria vrastare serbe ka fituar përkrahjen me aleancen e NATO-s, dhe në këtë mënyrë prishi balancat politike strategjike për Ballkanin dhe më gjërë. Ajo arriti që këto politika t’i orientoi kah perëndimi duke u larguar nga blloku ruso-sërb dhe ai i lindjes.” – vazhdoi Mustafa.
Ish-komandanti i UÇK-së nuk ka harruar të flasë edhe për pas luftën, duke theksuar se kishte një rrymë anti-UÇK.
“Periudha pas çlirimit, poashtu karakterizohet me veçantinë e luftës së ashpër të uzinave anti-shqiptare, nëpërmjet shërbimeve inteligjente të infiltruara në çdo cep të Kosoves.” – shtoi Remi.
Sipas Remit, kjo “uzinë anti-shqiptare” ka krijuar Gjykatën Speciale.
“Sado të paralizuara, ato arritën të ngrejnë kurthe, të prodhojnë propagandë anti UÇK, të shantazhojnë e mashtrojnë, e cka jo tjetër, me qëllim të rrënimit të amalgamës UÇK-NATO dhe në funksion të zhbërjes së lirisë së fituar me gjak.
Produktet e kësaj fushate anti UÇK dhe anti-shqiptare në pergjithësi, janë evidente dhe më substanciale ndër to është vet Gjykata Speciale, por ajo çfarë nuk arritën kurrë, është tendenca e pakompromis për të zhbërë aleancën e shteteve mike e pro-demokratike, me pasuesit e UÇK-së dhe me shtetin e Kosovës.” – shkroi ai.
Sjellim ndër mend që Nacionale ka shkruar kohë më parë për afrimin e ish-komandant Remi me pushtetin aktual./Nacionale







