Në Galerinë e Arteve u mbajtën takimet letrare “Adem Demaçi”, ku morën pjesë shumë letrarë, publicistë e personalitete të shquara nga fusha e artit dhe kulturës.
Në këtë takim morën pjesë edhe kryetari i Komunës, Shpejtim Bulliqi, drejtori i Kulturës, Rinisë dhe Sportit, Pajtim Balaj, poeti i njohur llapjan Nazmi Rrahmani, kryetari i shoqatës “Lidhja e Shkrimtarëve e Kosovës” Shyqri Gagica, deputetët Avni Dehari dhe Hydajet Hyseni, si dhe familjarë e miq të poetit të ndjerë Bislim Aliu.
Në fjalën para të pranishmëve kryetari i Komunës, Shpejtim Bulliqi tha se “I përgëzoj organizatorët për mbajtjen e takimeve letrare “Adem Demaçi” të cilat mëtojnë të bëhen tradicionale në komunën tonë. Gjithashtu kryetari Bulliqi në fjalën para të pranishmëve e kujtoi poetin dhe profesorin e ndjerë, Bislim Aliu të cilin e humbëm para pak muajsh, duke e veçuar si një bashkëpunëtor e koleg të mrekullueshëm”.
Në këtë manifestim u ndanë çmime për tri poezitë më të mira, kurse çmimin kryesor “Adem Demaçi” e fitoi autori Nazmi Rrahmani.
Në këtë ngjarje gjithashtu u promovua libri “Drithërima artistike” e autorit Bislim Aliu, ku prezantimin e librit para të pranishmëve e bëri znj. Fatmire Fusha.
Pas leximit të poezive dhe prezantimit të librit të pranishmit patën rastin të shohin edhe ekspozitën e përgatitur nga familjarët e Bislim Aliut, të punuara e përgatitura pak muaj para se të ndërronte jetë.
