Në objektin e galerisë së qytetit sot në Ditën Ndërkombëtare të Gruas është hapur ekspozita “Heroinat e Kohëve” e përgatitur nga nënkryetarja e Komunës, Marigona Lahu, drejtori për Kulturë, Rini dhe Sport, Pajtim Balaj dhe zyrtari për kulturë, Arbër Sfishta.
Ekspozita përmbanë 19 personalitete gra llapjane të cilat i thyen tabutë e kohës e dhanë kontribut të shquar në fusha të ndryshme si në: arsim, shëndetësi, shkencë, art, muzikë, ushtri etj.
Fjalë rasti në hapjen e ekspozitës mbajtën nënkryetarja Marigona Lahu dhe ushtarja e parë llapjane Bahrije Sylejmani.
Nënkryetarja Lahu tha “Përmes kësaj ekspozite për nder të ditës ndërkombëtare të gruas kemi synuar që të pasqyrojmë para publikut llapjanë kontributin e grave llapjane përgjatë historisë, të cilat përkundër paragjykimeve dhe stereotipizimeve thyen tabutë e kohës dhe arritën që të ofrojnë kontribut të çmuar në sfera të ndryshme, e për të cilat si institucione dhe si shoqëri kemi për obligim t’i vlerësojmë e nderojmë gjithmonë”.
Ushtarja e parë llapjane Bahrije Sylejmani në fjalën para të pranishmëve i falënderoi përfaqësuesit e Komunës për iniciativën e ndërmarrë dhe tha se ndjehet shumë e nderuar që për nder të ditës së gruas institucionet lokale janë përkujdesur për t’i kujtuar e respektuar ato që dhanë kontribut në fusha të ndryshme në kohë shumë të vështira për vendin.
Ekspozita “Heroinat e Kohëve” do të qëndrojë e hapur deri më 13 mars, nga ora 11:00 deri në 16:00.
