Nënshkruhet memorandum për zbatimin e projektit “Edukimi Medial – Ekspertiza Nordike në Arsim” në Podujevë
Kryetari i Komunës së Podujevës, Shpejtim Bulliqi, dhe përfaqësuesja e Iniciativës EEI (Education Empowerment Initiative), Blerta Aliu, kanë nënshkruar memorandum bashkëpunimi për zbatimin e projektit “Edukimi Medial – Ekspertiza Nordike në Arsim”.
Ky projekt synon forcimin e edukimit medial, sigurisë digjitale dhe mendimit kritik tek mësimdhënësit dhe nxënësit, duke promovuar një qasje moderne, gjithëpërfshirëse dhe të sigurt në arsim. Qëllimi është që mësimdhënësit dhe nxënësit të zhvillojnë aftësi për të lundruar me përgjegjësi në botën digjitale.
Kryetari Bulliqi theksoi rëndësinë e këtij projekti në kohën kur përdorimi i teknologjisë është në rritje dhe dezinformatat përhapen me shpejtësi në platformat digjitale, duke e cilësuar edukimin medial si më se të nevojshëm për mësimdhënësit dhe nxënësit.
Memorandumi parasheh që ekspertët nordikë të zhvillojnë një program “Training of Trainers” për ekipin lokal të EEI-së, i cili më pas do të trajnojë mësimdhënësit në shkollat e Podujevës. Pas përfundimit të programit, trajnerët e certifikuar do të mbajnë sesione trajnimi me 30-40 mësimdhënës në shkollat e përzgjedhura, me fokus në:
- Edukim medial dhe analizë kritike të burimeve të informacionit;
- Siguri digjitale dhe sjellje të përgjegjshme në internet;
- Parandalim të dezinformimit dhe përmbajtjeve të dëmshme online.
Kohëzgjatja e projektit është 18 muaj.
Në ceremoninë e nënshkrimit ishin të pranishëm edhe nënkryetarja e Komunës, Marigona Lahu, dhe drejtori për Arsim, Avni Fetahu.
