Në bazë të vullnetit të shteteve anëtare të BE-së, qytetarët e Kosovës më së voni deri më 1 janar 2024 nuk duhet të kenë më vizë kur udhëtojnë drejt Bashkimit Evropian.
Pas një vonese gjashtëvjeçare, Këshilli i BE-së vendosi të mërkurën që negociatat për regjimin pa viza mund të fillojnë. Që në vitin 2016, Komisioni i BE-së kishte propozuar heqjen e vizave për Kosovën.
Në bazë të mandatit të negociatave, Presidenca Çeke e Këshillit të BE-së dëshiron të nisë bisedimet me Parlamentin e BE-së.
Ministri i Jashtëm çek, Jan Lipavsky, foli për një hap të rëndësishëm në zbatimin e premtimit për heqjen e vizave për Kosovën.
“Liberalizimi i vizave është bërë i mundur nga përpjekjet e Kosovës për të forcuar kontrollet e saj kufitare, menaxhimin e migracionit dhe sigurinë dhe ne besojmë se ky bashkëpunim i mirë do të rritet më shumë në të ardhmen”, tha Lipavsky.
Mbajtësit e pasaportave kosovare do të mund të udhëtojnë në BE pa vizë për një periudhë tre mujore. Një kusht për këtë ishte aderimi i Kosovës në Sistemin Evropian të Informacionit dhe Autorizimit të Udhëtimit (ETIAS), i cili është planifikuar të hyjë në fuqi në nëntor 2023.
Eurodeputeti austriak i të Gjelbërve, Thomas Waitz, kritikoi institucionet e BE-së për vonesat drejt këtij vendimi.
“U desh shumë kohë që shtetet anëtare të binin dakord përfundimisht për negociatat”, kritikoi eurodeputeti Waitz.
Ai tha se kjo ka dëmtuar masivisht besueshmërinë e BE-së. “Lidhja e liberalizimit të vizave me pjesëmarrjen në ETIAS e shtyn në mënyrë të panevojshme procesin edhe një herë. Nga të gjitha vendet e Ballkanit Perëndimor, Kosova tashmë ka përmbushur shumicën e kushteve dhe shumë reforma si siguria e dokumenteve, menaxhimi i kufijve dhe migracionit, rendi dhe siguria publike dhe forcimi i të drejtave themelore janë zbatuar prej kohësh”, thotë Waitz, raporton APA, transmeton Klankosova.tv
Kreu i delegacionit të SPO-BE dhe raportuesi i grupit të tij parlamentar për Kosovën, Andreas Schieder, u shpreh i kënaqur me vendimin e sotëm.
“Kosova e ka përmbushur pjesën e saj të detyrës. Vonesa e gjatë me të drejtë ka shkaktuar shumë zhgënjime në popullatë, liberalizimi i vizave është i vonuar dhe hapi i duhur”, tha Schieder, përcjell Klankosova.tv.
Ai u shpreh i bindur se negociatat me Këshillin e BE-së do të arrijnë shpejt në një përfundim të suksesshëm.
Një deklaratë të ngjashme bëri edhe eurodeputeti tjetër austriak i OVP-së, Lukas Mandl ku tha se nëse përsëri ka pengesa, Bashkimi Evropian “do të humbasë fytyrën”.
“Edhe pas përmbushjes së të gjitha kritereve, Kosovës iu desh të priste gati gjysmë dekade. Duke pasur parasysh dobësitë e dukshme në strukturat vendimmarrëse të BE-së që kanë dalë në dritë këtu, lind përsëri çështja e ndryshimeve të traktatit”, tha Mandl,
