Mungesa e anesteziologëve në Qendrën Klinike Universitare (QKUK) ka bërë që shumë operacione të shtyhen dhe të zgjaten listat e pritjes. E një ndër klinikat që përballet me mungesë të anesteziologëve është dhe ajo e Ortopedisë, në të cilën momentalisht punojnë vetëm dy anesteziolog. E ortopedi Pleurat Sejdiu thotë se Klinika e Ortopedisë gjatë këtij viti rrezikon të mbetet fare pa anesteziolog, pasi që njëri nga ta shkon në pension dhe tjetri ka thënë se do ta lëshoj punën. E në rast se kjo klinikë gjatë këtij viti mbetet pa anesteziolog, Sejdiu thotë se puna në këtë klinikë do të paralizohet dhe nuk do të mund të kryhen operacionet.
“Në ortopedi i kemi dy anesteziolog, gjatë këtij viti njëri nga ta shkon në pension . E edhe anesteziologu tjetër ka thënë se në momentin që ai shkon në pension edhe unë e lëshoj punën. Sepse as ai nuk mund ta duroi më presionin. Dhe puna mund të paralizohet dhe nuk mund të kryhen as operacionet”, tha ai.
E mungesa e anesteziologëve ka bërë që sallat e operacionit të mos punojnë me kapacitet të plotë. Sipas Sejdiut nga katër salla të reja në Ortopedi vetëm dy janë funksionale, për shkak të mungesë së anesteziologëve.
“Tek ne në ortopedi i kemi katër salla të reja dhe rrallë herë çelet salla e tretë. Sepse janë dy anesteziolog, i treti ndonjëherë, shpesh është vetëm një dhe nuk mund të mbulohen katër salla. Kemi presion të madh prapë për proteza dhe ende nuk po mund t’i kryejmë të traumës, të cilat kanë prioritet dhe automatikisht rritet pakënaqësia dhe lista e pritjes për intervenime, kjo shkon zinxhir tek pakënaqësia e marrësve të shërbimeve”, thotë ai.
E shqetësuese mbetet dhe mungesa e teknikëve të anesteziologjisë, të cilët sipas Sejdiut po ikin me të madhe nga Kosova.
“Është ngrit problematika e anesteziologut që po e lëshojnë, por është problematikë po e njëjtë edhe ikja e teknikëve të anesteziologjisë, se ata janë të shkolluar për atë punë. Edhe ata në një numër të madh janë duke u larguar, por ata po largohen jashtë Kosovës. Janë shumë të kërkuar. Nuk është duke u bërë mjaftueshëm tek menaxheret që me menaxhu këtë punë në spitale, pasi që ka mundësi mjaftë që të stimulohen ata që të mbeten. Nuk është vetëm çështja e të hollave, por presioni në punë është duke i larguar një pjesë të madhe”, thotë Sejdiu./IndeksOnline/
