Presidentja e Kosovës, Vjosa Osmani, ka thënë se presidenti i ShBA-së, Donald Trump, ka kontribuar në mbrojtjen e situatës nga tentimi i Serbisë për përshkallëzim në muajin maj të këtij viti.
Osmani, në një intervistë për “Fox Neës”, gjatë qëndrimit të saj në Nju Jork, ka përmendur aktin e agresionit serb në shtator të vitit 2023 në Banjskë të Zveçanit, derisa ka theksuar se ekziston një rrezik i vazhdueshëm që vjen nga Serbia.
“Ende ka njerëz atje në udhëheqjen e Serbisë që duan të kapen pas së kaluarës dhe të na kthejnë të gjithëve në të kaluarën, ndërsa ne duam të shikojmë drejt së ardhmes. Presidenti Trump ka ndihmuar shumë në mbështetjen e paqes, në ruajtjen e saj dhe në shpëtimin e jetëve, dhe kjo ka qenë thelbësore… Kemi pasur disa shpërthime të tensioneve gjatë viteve të fundit. Për shembull, në shtator 2023, pati një akt agresioni nga Serbia kundër Republikës së Kosovës. Ne arritëm ta zmbrapsim atë me mbështetjen e aleatëve tanë të NATO-s. Megjithatë, ekziston një kërcënim i vazhdueshëm që vjen nga Serbia. Në majin e kaluar, sigurisht, pati një tjetër tentativë shpërthimi, nëse mund ta quaj kështu. Dhe kjo administratë ka bërë një punë të mrekullueshme për të parandaluar që ato të përshkallëzohen”, tha ajo.
Krahas kësaj, Osmani theksoi rolin e ShBA-së në mbështetjen e pavarësisë dhe sovranitetit të Kosovës.
Ajo gjithashtu thuri lavde ndaj presidentit Trump, i cili, sipas saj, është një udhëheqës që flet me qartësi, forcë dhe bindje.
“Presidenti ka qenë gjithmonë një udhëheqës që flet me qartësi, forcë dhe bindje. Prandaj, ndërsa merr skenën në Kombet e Bashkuara sot, ne presim një mesazh të fuqishëm paqeje përmes forcës. Kjo ka dhënë rezultate në pjesën tonë të Evropës, sepse ky është i vetmi mesazh që autokratët dhe udhëheqësit e çmendur në mbarë botën që duan të vrasin dhe të shkaktojnë vuajtje e kuptojnë. Dhe presidenti Trump, siç thashë, ka qenë shumë i suksesshëm në parandalimin e përshkallëzimeve të mëtejshme dhe parandalimin e luftërave të tjera. Vetëm imagjinoni, ne jemi një vend ku çdo brez para fëmijëve tanë duhej të kalonte një luftë. Gjyshërit tanë duhej të kalonin një luftë. Prindërit tanë, ne vetë, duhej të kalonim një luftë gjenocidale. Dhe tani fëmijët tanë mund të shkojnë në shtrat pa zhurmën e armëve dhe pa frikën me të cilën ne duhej të rriteshim si fëmijë lufte — falë udhëheqjes amerikane”, shtoi ajo.
Osmani po qëndron në ShBA në kuadër të mbledhjes së Asamblesë së Kombeve të Bashkuara./KosovaPress/
