Presidentja e Kosovës, Vjosa Osmani ka uruar qytetarët e Kosovës për liberalizimin e vizave që u miratua të martën nga Parlamenti Evropian.
Përmes një shkrimi në rrjetin social ‘Facebook’, Osmani këtë vendim e ka vlerësuar si fitore edhe për Evropën.
“Vendimi i sotëm final për liberalizimin e vizave për qytetarët e Kosovës është fitore, jo vetëm për vendin tonë, por për vetë demokracinë dhe unitetin në Evropë”.
Për dallim nga Qeveria që meritat ia la vetit, Osmani i vendosi meritat për popullin.
“Ky vendim është meritë e popullit të Kosovës, vendosmërisë së pashembullt të treguar përgjatë viteve, pavarësisht vonesave dhe padrejtësive të ndryshme”, ka shkruar Osmani.
Teksa ka shtuar se më 1 janar qytetarët më fund do të jetë të barabartë me popujt tjerë evropian.
“Më 1 janar 2024, qytetarët tanë më në fund do të ndihen të barabartë me popujt tjerë evropian, për të lëvizur lirshëm në kontinentin që ata i përkasin, e për të cilin kanë kontribuar ndër shekuj”.
“Tanimë, lëvizja në shtetet evropiane është më e lehtë, familjet tona janë më afër dhe mundësitë për avancim e bashkëpunim më të mëdha”.
Parlamenti Evropian miratoi vendimin për liberalizimin e vizave për qytetarët e Kosovës, të martën e 18 prillit.
Ky votim ishte hapi përfundimtar në proceduarën për liberalizimin e vizave.
Miratimi u bë pa votim, pasi nuk kishte asnjë kundërshtim.
“Nuk kam marrë asnjë propozim për të refuzuar qëndrimin e Këshillit të ministrave të BE-së dhe asnjë amendament. Prandaj, është miratuar qëndrimi i Këshillit dhe është miratuar akti i propozuar”, tha kryetarja e Parlamenti Evropian, Roberta Metsola.
Më 19 prill, pritet të nënshkruhet akti ligjor për liberalizimin e vizave, ndërsa hapi i vetëm që duhet të bëhet pas kësaj, është botimi i vendimit në Gazetën Zyrtare të BE-së dhe hyrja në fuqi e tij. /Albanianpost.com
