Ish-presidentja Vjosa Osmani ka prezantuar Arjeta Musliun, si emrin e radhës që do të garojë me të në listë për zgjedhjet e 7 qershorit. Vetë Osmani ka arritur dakordim për garim të përbashkët me Lidhjen Demokratike të Kosovës.
Musliu njihet si themeluese e një qendre për të mbështetur individët e varur nga droga.
Paraprakisht, Osmani ka prezantuar ish-deputeten Jeta Statovci si kandidate krah saj.
Postimi i Osmanit:
Historia e saj nuk u formësua nga politika, por nga dhimbja.
Me një plagë që shumëkush nuk e sheh, por që ajo e ka kthyer në forcë. Në vend që ta thyejë, ajo e ka shndërruar në mision për të shpëtuar jetë, për t’u dhënë zë familjeve që luftojnë në heshtje, për t’u rikthyer shpresën atyre që e kanë humbur.
Kjo është Arjeta Musliu.
Një grua që nuk vjen në këtë rrugëtim për veten e saj, por për çdo nënë që zgjohet çdo ditë me frikën për fëmijën, për çdo motër e vëlla që nuk pranon të dorëzohet, për çdo familje që ka përjetuar dhimbjen e varësisë nga substancat narkotike, për çdo të ri që ka nevojë për një dorë që e nxjerr nga errësira.
Për këtë rrugëtim, pata nderin që në vitin 2021 ta dekoroj me Urdhrin Presidencial “Shote Galica”.
Arjetën e kemi mbështetur dje.
E mbështesim sot.
Dhe do ta mbështesim gjithmonë.
Ajo do të jetë zëri i kësaj kauze në Kuvendin e Kosovës
E dashur Arjeta, mirë se vjen!
